बागमतिया मुख्यमन्त्री हिलीगु

येँ (नेपालभाषा टाइम्स)÷बागमति प्रदेशया मुख्यमन्त्री हिलेगु निंतिं कसरत शुरु जूगु दु । मुख्यमन्त्री हिलेत नेपाली कांग्रेस व माओवादी केन्द्रया सांसदतय् हस्ताक्षर मुंकेगु न्ह्यानाच्वंगु खँ सीदुगु दु ।

वर्तमान मुख्यमन्त्री राजेन्द्र पाण्डे मुख्यमन्त्री जूगु इलय् हे नेपाली कांग्रेस व नेकपा एस दथुइ चुनावी सरकारया नेतृत्व कांग्रेसं यायेगु सहमति जूगु खः । आः वयाः मुख्यमन्त्री पाण्डे उगु सहमतिं लिचिउगुलिं वय्कःयात चीकेत सत्तारुढ दलतय् दुने हे हस्ताक्षर मुंकेगु ज्या न्ह्याःगु खँ धाःगु दु ।

मुख्यमन्त्री पाण्डें बजेट क्वचायेवं राजीनामा बियाः कांग्रेस नेता इन्द्रबहादुर बानियाँयात मुख्यमन्त्री दयेकेगु शर्तय् न्हापा मुख्यमन्त्री जूगु खः । आः वय्कलं केन्द्रया निर्देशन मवयेकं थम्हं मुख्यमन्त्री त्वःतेगु जुइ मखु धकाः अडान काःगुलिं वय्कःया विरुद्ध हस्ताक्षर संकलनया ज्या न्ह्याकूगु खः ।

पाण्डे वंगु कार्तिक ११ गते खुला लिपा मुख्यमन्त्री त्वःतेगु शर्त कथं कांग्रेस, माओवादी केन्द, जसपा व नेकपा (एस) या समर्थनय् मुख्यमन्त्री जूगु खः । कांग्रेसं सहमति कथं अःपुक थःपिंत सत्ता लःल्हायेमाःगु माग याःगु खःसां मुख्यमन्त्री पाण्डें केन्द्रीय नेतृत्वया निर्देशन लिपा जक पद त्वःतेगु खँ ल्हायेवं सत्तारुढ दलत तम्वःगु खँ धाःगु दु ।

म्हिगः तक सीदु कथं कांग्रेसया २२ व माओवादी केन्द्रया २३ म्ह सांसदतय्सं हस्ताक्षर यायेधुंकूगु दु । बागमति प्रदेशय् बहुमतया निंतिं ५४ म्ह सांसद माः । मुख्यमन्त्रीयात दवाव बीकथं माओवादी केन्द्र व कांग्रेसं मन्त्रिपरिषदय् दुथ्याःपिं मन्त्री व राज्यमन्त्रीत लित सःतेगु तयारी यानाच्वंगु खँ नं सीदुगु दु ।

बागमति प्रदेशय् मुख्यमन्त्री हिलेगु निंतिं कांग्रेस नेता बानियाँ येँय् झाःगु दु । प्रधानमन्त्री शेरबहादर देउवा लिसे सहलह यायेत वय्कः येँय् झाःगु खः ।

थ्वहे झ्वलय् बागमति प्रदेशय् सरकार हिलिगु खँया बारे न्यागू दलीय गठबन्धनया केन्द्रीय बैठकं हे याइगु खँ मुख्यमन्त्री पाण्डें धयादीगु दु । प्रदेशसभां बजेट पास जुइधुंकाः मुख्यमन्त्री हिलेत सत्तारुढ गठबन्धन कांग्रेस व माओवादी केन्द्रया सांसदपिनिगु हस्ताक्षर मुंकेगु सुरु याःगु समाचार पिहां वयेवं मुख्यमन्त्री पाण्डें ट्वीटरपाखें उगु विषयय् थःगु औपचारिक धापू सार्वजनिक यानादीगु खः । वय्कलं यानादीगु ट्वीटय् धयातःगु दु, ‘बागमति प्रदेशय् सरकार हिलेगु विषयलिसे स्वानाः वःगु न्ह्यसःया लिसः गठबन्धनया मू स्पिरिट कायम जुइ कथं आः वइगु छुं न्हिया दुने हे क्वःछीगु जुइ ।’