मल्ल व रामेशयात गंकी–धुस्वां सिरपाः
येँ – गंकी धुस्वां बसुन्धरा प्रतिष्ठानपाखें निदँय् छक्वः बिया वयाच्वंगु गंकी–धुस्वां बसुन्धरा सिरपाः थुगुसी उपन्यासकार मल्ल के. सुन्दरयात लःल्हाःगु दु । प्रतिष्ठानया ग्वसालय् म्हिगः जूगु छगू समारोहय् जनकवि दुर्गालाल श्रेष्ठं ५० द्वः तकाया उगु सिरपाः लःल्हानादीगु खः ।
उगु हे समारोहय् जनगायक रामेशयात थुगुसीया धुस्वां साय्मि सिर्जना सम्मानं छाय्पिउगु खः । ज्याझ्वलय् जनकवि दुर्गालाल श्रेष्ठं थःगु न्हापांगु कृति पिथनेगु निंति धुस्वां साय्मिं आर्थिक ग्वाहालि यानादीगु खँ कनादिल । वय्कलं छम्ह सफल च्वमिया लिसें धुस्वां साय्मि तःफागु नुगः दुम्ह नेवाः व्यक्तित्व खः धकाः नं धयादिल ।
सम्मानित व्यक्तित्व रामेश श्रेष्ठं नेपाली जनता सम्मानित जुइकेत थज्याःगु सम्मानं ग्वाहालि याइ धयादिल । उपन्यासकार मल्ल के. सुन्दरं थम्हं पेशा वा नशाया रुपय् मखुसें थःगु नेवाः भाय्यात नेपाली भाय् मधासे राज्यं यानातःगु विभेदया विरुद्ध च्वसा न्ह्याकाच्वनागु खँ कनादिल ।
गंकी धुस्वां बसुन्धरा प्रतिष्ठानया नायः डा. अरुण साय्मिया सभापतित्वय् जूगु उगु ज्याझ्वलय् गायक रामेशं थीथी प्रगतिशील म्येँ न्यंकादीगु खः । ज्याझ्वलय् सम्मानित व्यक्ति रामेशया म्हसीका हरिप्रसाद वैद्य व मल्लया म्हसीका अनिता तुलाधरं बियादीगु खःसा हरिहर शर्मां सुभाय् देछानादीगु खः ।
LEAVE YOUR COMMENTS