उपराष्ट्रपतिइ यादव त्यात
येँ (नेपालभाषा टाइम्स)÷नेपाःया स्वम्हम्ह उपराष्ट्रपतिइ जनता समाजवादी पार्टीया नेता रामसहायप्रसाद यादव निर्वाचित जूगु दु । म्हिगः जूगु निर्वाचनय् यादवं एमालेया उपाध्यक्ष अष्टलक्ष्मी शाक्य व जनमत पार्टीया नेता ममता झायात बुकाः उपराष्ट्रपतिइ निर्वाचित जुयादीगु खः । यादवं ३० हजार ३२८ मतभार काःगु खः । वय्कलं संघीय संसदपाखे १४ हजार ५३६ व प्रदेशसभापाखें १५ हजार ७९२ मतभार काःगु खः । प्रतिनिधिसभा, राष्ट्रियसभा व प्रदेशसभाया सांसदतय्सं उपराष्ट्रपतिया चुनावय् मतदान याःगु खः । प्रतिनिधिसभा व प्रदेशसभा यानाः मुक्कं मतभार ५२ हजार ६२८ दु ।
उकथं हे वय्कःया निकटम प्रतिस्पर्धी एमालेया उम्मेदवार अष्टलक्ष्मी शाक्यं प्रदेशपाखें ८ हजार ११२ व संघीय संसदपाखें ८ हजार २१६ यानाः मुक्कं १६ हजार ३२८ मत काःगु दु ।
जनमत पार्टीया उम्मेदवार ममता झां प्रदेशपाखें७२० व संघपाखें १ हजार ८१७ यानाः २ हजार ५३७ मतभार काःगु खँ राष्ट्रपति–उपराष्ट्रपति निर्वाचन अधिकृतया ज्याकुथिं धाःगु दु ।
उकथं हे जसपाया उपराष्ट्रपतिया मेम्ह उम्मेदवार प्रमिला कुमारीं प्रदेशपाखें ४८ मतभार अथे धइगु छम्हेसित मत काःगु दु । सत्ता गठबन्धनया आधिकारिक उम्मेदवार रामसहायप्रसाद यादव जूगुलिं प्रमिलां थःगु उम्मेदवारी निष्क्रिय जूगु घोषणा याःगु खः ।
LEAVE YOUR COMMENTS