वातावरण व्यवस्थापनय् स्वनिगःया रैथाने ज्ञान उपयोगी

येँ- येँ महानगर प्रमुख बालेन्द्र शाहं वातावरण व्यवस्थापनया निंतिं रैथाने ज्ञान उपयोगी जूगु खँ धयादीगु दु । स्वनिगलय् खुल्ला जमिनया अभाव जुया वंगुलिं हे पुनर्भरणया अवसर म्हो जुया वनाः थौं राजधानी सहरय् ट्यांकर व जारया भरय् च्वनेमाःगु वय्कलं धयादिल ।

नेवाःतय्सं दछियंकं हनीगु नखःचखःमध्ये दकलय् लिपांगु सिथिनखःया महत्वया विषयय् थःगु धारणा तयेगु झ्वलय् महानगर प्रमुख शाहं उगु खँ धयादीगु खः । वय्कलं लः व लःया स्रोत संरक्षण यायेगु ज्याय् सिथि नखःया तःधंगु भूमिका दुगु नं धयादिल ।

त्वनेगु लःया समस्या समाधानया निंतिं लःलिसे सम्बन्धित रैथाने ज्ञानया उपयोग यानाः ल्वहंहिति, बुंगाः व तुंयात पुनःजीवित यायेमाःगु व उकिया निंतिं महानगरं माक्व बजेटया व्यवस्था यायेगु नं धयादिल ।

नेवाःतय्सं दँय्दसं तछलाथ्व षष्ठिया दिं सिथि नखः हना वयाच्वंगु दु । थ्व कुन्हु नेवाःतय्सं विशेष यानाः वः छुनाः नयेगु नापं लःया स्रोतया सुचुकुचु यायेगु याना वयाच्वंगु दु । थ्व दिं कुन्हु लःया मुहानलिसें लःया स्रोतकथं कयातःगु ल्वहंहिति, गाःहिति, बुंगाः, तुं, जरुं आदिया सुचुकुचु यायेगु याइ ।

थ्व हे झ्वलय् थुगुसी सिथि नखःकुन्हु हे विश्व वातावरण दिवस नं लाःगुलिं थ्व अवसरय् महानगरीय प्रहरी बलं माइतीघर मण्डलानिसें न्हू बानेश्वरतकया सतकखण्ड सुचुकुचु याःगु दु ।

सन् १९७३ जून ५ निसें विश्व वातावरण दिवस हनेगु याःगु खः । थुगुसी ‘केवल छगू पृथ्वी’ नारा बियाः विश्वन्यंकं थ्व दिवस हंगु खः ।