बुंगया सोह्रखुट्टे फल्चाया अवस्था जीर्ण

यल(नेपालभाषा टाइम्स)÷थनया बुंगस्थित ऐतिहासिक व धार्मिक महत्वया सोह्रखुट्टे फल्चा जीर्ण अवस्थाय् थ्यंगु दु । यल महानगरपालिका वडा नं. २२ बुंगय् च्वंगु ऐतिहासिक महत्वया सोह्रखुट्टे पाटी पुनःनिर्माण मजुइवं जीर्ण अवस्थाय् थ्यंगु खः ।
२०७२ सालया भुखाचं क्षति जूगु आपालं सम्पदा पुनःनिर्माणया ज्या न्ह्याःसां थन च्वंगु थुगु सम्पदा पुनःनिर्माण यायेगु ज्याय् सम्बन्धित निकायं अझं ध्यान बियाच्वंगु मदु ।

इतिहासकारतय्कथं झिंखुगः थां तयाः दयेकातःगुलिं हे सो¥हखुट्टे पाटी धायेगु यानाच्वंगु व स्वनिगलय् आपालं फल्चा, सतः दुसां थुकथंया फल्चा धाःसा म्हो जक दु । ऐतिहासिक आकृतिइ दयेकातःगु थनया सो¥हखुट्टे पाटी छखे जीर्ण अवस्थाय् दुसा मेखे छगः थां नं भुखाचं बांमलाक क्षति याना बिउगु दु । मेखे जीर्ण थ्व फल्चा लिपांगु इलय् प्रयोगविहीन नं जुयाच्वंगु दु ।

ऐतिहासिक व धार्मिक महत्वया थ्व फल्चाय् बुंगद्यःया झिंनिदँया जात्राया इलय् रथयात बासं तयेमाःगु प्रचलन दु । थ्व हे इलय् सो¥हखुट्टे फल्चाय् कुमारि माजुयात तकं बिज्याकेगु याइ । झिंनिदँय् छक्वः बुंगःनिसें बुंगद्यः रथय् तयाः साला हयाः यल देय् चाःहिइकेधुंकाः हाकनं बुंगय् यंकेगु परम्परा दु ।

गुगुं इलय् थ्व फल्चाय् येँ, यल, ख्वप, किपूलिसें बुंगयापिं नं थीथी थासय् वनेगु इलय् त्यानु लंकेत झासु लनेगु व बहनि लिबात धाःसा बासं तकं च्वनेगु याइ स्थानीय मानकुमार महर्जनं कनादी । वय्कलं कनादी, ‘थ्व सो¥हखुट्टे पाटी ऐतिहासिक महत्वं जाःगु फल्चा खः, मेमेगु फल्चा स्वयां थ्व गाक्कं पाः । भुखाचं क्षति याये न्ह्यःतक नं थ्व बांलाःगु अवस्थाय् दुगु खःसा आः जीर्ण अवस्थाय् दु ।

इतिहास कुबियाच्वंगु थ्व फल्चा सतक लिक्कं लाः । थन सतक विस्तार यायेमाल धाःसा फल्चायात मेथाय् तये यंके मालीगु तकया अवस्था दु । यल महानगरपालिका २२ वडाअध्यक्ष सागर तुलाधरं समिति व सरोकारवालातलिसे सहलह यानाः आः दुगु थासं भचा लिउने तयाः पुनःनिर्माण यायेगु जुइ धयादीगु दु ।

फल्चा पुनःनिर्माणया निंतिं महानगरपालिकापाखें २५ गू लख तका बजेट नं विनियोजन यानातःगु दु । भुखाचं क्षति जूगु मेमेगु इतिहास कुबियाच्वंगु व धार्मिक महत्वया आपालं सम्पदा निर्माण जुइधुंकूगु दुसा आः थ्व फल्चा नं याकनं पुनःनिर्माण यायेगु तयारी जुयाच्वंगु दु ।