महर्जन कम्प्लेक्स मुद्दां त्यात

येँ – थनया न्हू सतकय् दयेकाच्वंगु महर्जन कम्प्लेक्सया भवन मापदण्ड दुने हे लाःगु जुयाः थुकिया छुं नं अंश स्यंके माःगु वा थुने माःगु आवश्यक मजूगु फैसला सर्वोच्च अदालतं न्यंकूगु दु । वंगु वालय् सर्वोच्चया थ्व फैसला वःगु खः । उगु छेँया जाः (उचाई) अप्वः जूगु व बेसमेन्ट नं नियम विपरित दयेकूगु धासें छुं मनूतय्सं सर्वोच्चय् रिट तःगु खः ।

सर्वोच्च अदालतं थ्व भवन दुगु लागा हनुमानध्वाखा सम्पदा क्षेत्रया ‘कोर जोन’ दुने मलाःगु जुयाः थ्वं बेसमेन्ट दयेके फइ धकाः फैसला याःगु खः । लिसें न्हापा अन दुगु छेँ (होटल क्रिष्टल) ५४ फिट स्वयां अप्वः दुगु व येँ मनपां नकतिनि जारी याःगु न्हूगु मापदण्डय् ६५ फिट तक छेँ दने दइगु व्यवस्था याना तःगु खँ न्ह्यथँसें फैसलाय् व्यक्तिया थःगु सम्पत्ति भोग यायेगु अधिकारयात संकुचित यायेगु उचित मजू धकाः नं धयातःगु दु ।

फैसलाय् उगु भवन दुने बँय् लानाच्वंगु कुमारीया निराकार मूर्ति साबिक स्थानय् तयेमाः धयातःगु दुसा महर्जन कम्प्लेक्सं भवन निर्माण सिधयेवं मूर्ति अन हे पलिस्था यायेगु खँ धाःगु दु । आः निर्माण सिधयेकाः वि.सं. २०७६ या न्हूदँनिसें अन पसः चायेकेगु खँ नं धाःगु दु ।