रिले अनसनय् चिकित्सकत विभाजित

येँ – अनसन च्वनाच्वंम्ह डा. गोविन्द केसीया जीवन रक्षा यायेमाःगु माग यासें चिकित्सकतय्सं म्हिगःनिसें रिले अनसन शुरु याःगु दु ।
चिकित्सा शिक्षा सुधार लगायत थीथी माग तयाः वंगु पुस २५ गते निसें अनसन च्वनाच्वंम्ह डा. केसीया माग पूवंकेत सरकारं आलताल यानाच्वंगु धासें नेपाल चिकित्सा संघं रिले अनसन शुरु याःगु खः ।

चिकित्सक संघं थःपिं अनसन च्वंसां नं सेवा सञ्चालन प्रभावित मजुइगु खँ धाःगु दु । पालंपाः अनसन च्वनाः सेवायात निरन्तरता बीगु संघया अध्यक्ष मुक्तिराम श्रेष्ठं कनादिल । अनसन सुथय् १० बजेनिसें ५ बजे तक न्ह्याइगु खँ धाःगु दु । रिले अनसन लिपा नं माग सम्बोधन मजुल धाःसा कडा आन्दोलन याये मालीगु ख्याच्वः नं संघं बिउगु दु ।

संघया रिले अनसनयात देय्न्यंकंया चिकित्सकतय्सं नं समर्थन यासें रिले अनसन च्वंगु दु । थ्वहे झ्वलय् चिकित्सक आन्दोलनयात कयाः चिकित्सकतय् दथुइ विवाद ब्वलंगु दु । नेकपा लिसे सतीपिं चिकित्सकतय्सं डा. केसीया आन्दोलन राजनीतिक प्रेरित जूगु धासें रिले अनसनय् ब्वति मकायेगु घोषणा याःगु दु ।

अनसनया विपक्षी चिकित्सकतय्सं डा. केसीया अनसन कांग्रेसया एजेन्डा जूगु धासें थःपिंसं उकियात साथ बी मफइगु खँ धाःगु दु । उमिसं डा. केसीया माग स्वास्थ्य सम्बन्धी जुतले थःपिंसं नं साथ बियागु खःसा आः धाःसा साथ बी मफइगु खँ धाःगु दु । मेखे त्रिभुवन विश्वविद्यालय शिक्षण संस्थां छगू वक्तव्य पित बिसें अस्पताल दुने गुगुं नं कथंया आन्दोलनया ज्याझ्वः मयायेत चिकित्सक संघयात इनाप याःगु दु ।

अस्पतालया कार्यकारी निर्देशक प्रेमकृष्ण खड्कां विज्ञप्ति जारी यासें विरामीया उपचारय् लिच्वः लाइ धासें बन्द, हडताल थेंज्याःगु ज्याझ्वः अस्पताल लागाय् मयायेत इनाप यानादीगु खः । थ्व ज्या देय्या ऐन नियम व चिकित्सकीय नैतिक दायित्व कथं नं पाय्छि मजूगु खँ वक्तव्यय् धयातःगु दु ।

राष्ट्रिसभां नं पारित
विरोधया दथुइ प्रतिनिधिसभां पारित याना हःगु राष्ट्रिय चिकित्सा शिक्षा विधेयकयात राष्ट्रियसभां नं म्हिगः पारित याःगु दु । कांग्रेसया सांसदतय्सं नाराबाजी यानाच्वंगु इलय् राष्ट्रियसभाया सचिवं विधेयक टेबुल यासें पारित याःगु खः । प्रतिनिधिसभां पारित याःगु विधेयकयात राष्ट्रियसभां संशोधन यायेमाःगु माग जुयाच्वंगु खः ।

सम्बन्धित बुखँ

LEAVE YOUR COMMENTS