थेच्वय् दुरुपा व मचाछेँया स्वास्थ्य शिविर

यल – थेच्व नेवाः इंग्लिश स्कुल व गोदावरी नगरपालिका वडा नं. १२ या मंकाः ग्वसालय् स्कुलया प्रांगणय् मिसातय् दुरुपा व मचाछेँया छगू निःशुल्क स्वास्थ्य शिविर जुल ।नेपाल अर्बुद रोग निवारण संस्था लगंख्यःया प्राविधिक ग्वाहालिं जूगु शिविरय् ९१ म्ह मिसापिनि दुरुपा व मचाछेँया परीक्षण याःगु खः ।

ल्वचं कयेधुंकाः वासः यायेगु स्वयां ल्वय् हे जुइके मबी धइगु सर्वोपरि मान्यतायात व्यवहारिक रुपं कार्यान्वयन यायेकथं मिसातय्त प्रजनन स्वास्थ्यसम्बन्धी जनेचतना अभिवृद्धि यायेगु व ल्वय् जूगु अवस्था ल्वय् सुचुकेगु मखसे वासः यायेमाः धइगु उद्देश्यं शिविर न्ह्याकागु स्कुलया प्रिन्सिपल नविन थेच्वमिं कनादिल ।

अप्वःथें मिसात छेँज्याय् जक तक्यनाच्वनीगु व मछालीगुलिं यानाः वासः याये लिबाइगु जक मखसे ल्वय् हे सुचुका जुइगु अवस्थां मत्यवं थःगु ज्यान तकं जोखिमय् लाके मालीगु स्थितियात ध्यानय् तयाः स्कुलया इहिपा जुइधुंकूपिं अभिभावक व स्थानीय थेच्वया तःकेहेंपिंत लक्षित यानाः न्ह्याकूगु उगु शिविर न्ह्याकूगु खः ।

शिविर न्ह्याके स्वयां छुं दिं न्ह्यः ‘दुरुपा व मचाछेँया परीक्षण’ सम्बन्धय् छगू प्रवचनात्मक कक्षा नं संचालन याःगु खःसा शिविरय् वादे, बुलु, सुनागुथि व थेच्वया मिसातय्सं स्वास्थ्य परीक्षण याकूगु खः ।