येँया १४ वडाय् समुदायस्तरय् ल्वय् न्यना वन, आः कोरोना इपिसेन्टर येँदेय्
येँ (नेपालभाषा टाइम्स) – नेपाः दुने आः कोरोना संक्रमणया ‘इपिसेन्टर’ संघीय राजधानी येँ देय् जुइगु सम्भावना ब्वलंगु दु। वंगु छुं न्हि न्ह्यवंनिसें देय्-न्यंकं खने दइपिं न्हूपिं कोराना विरामीत मध्ये दकलय् अप्वः ल्याः येँय् हे खने दइगु जुयाच्वंगु दु ।
म्हिगः स्वनिगलय् १२७ म्ह न्हूपिं संक्रमित लूगु खःसा उकी मध्ये येँय् १११ म्ह लूगु खः । यलय् ११ म्ह व ख्वपय् न्याम्ह संक्रमित लूगु खः । येँ धुंकाः दकलय् अप्वः मोरबय् ८८ म्ह संक्रमित लूगु खः । येँय् दुने नं कलंकी-कुलेश्वर क्षेत्र लाःगु वडा नं. १४ दकलय् संवेदनशील लागा जूगु दु। थ्व वडाय् कोरोना संक्रमण समुदायस्तरय् न्यना वनेधुंकूगु खँ वडा अध्यक्ष शोभा सापकोटां कनादीगु दु ।
म्हिगः वय्कलं छगू विज्ञप्ति जारी यासें १४ वडाय् समुदायस्तरय् हे कोरोना न्यना वंगु जूगुलिं आः वडाय् सुं नं पिहां मवयेत इनाप यानादीगु दु। थ्व वडाया सुनार गाउँ, कुलेश्वर व आवर्तनगर दुने कोरोना संक्रमित खने दुगु खः । अध्यक्ष सापकोटां आः १५ न्हु तक छेँनं सुं नं पिहां मवयेत, छेँय् सुं पाहांपिं नं मसःतेत व मेपिनि छेँय् नं मवनेत इनाप याःगु दु। वडा कार्यालयपाखें अत्यावश्यक बाहेक मेगु सेवा नं बन्द यायेधुंकूगु दु ।
नेपालय् म्हिगः जक ५२५ म्ह न्हूपिं संक्रमित लूगु दुसा प्यम्ह सीगु दु। थुकिया लिसें नेपालय् मुक्कं संक्रमितया ल्याः २४ हजार ९५७ थ्यंगु दु। उकथं हे नेपालय् सीपिनिगु ल्याः ९६ म्ह थ्यंगु दु। अथेहे वासः यानाः १६ हजार ८३७ म्ह लनेधुंकूगु दु।
थ्वहे झ्वलय् कोरोना संक्रमण समुदायस्तरय् तक थ्यंगु खः मखु सीकेत सरकारं सेरोलजिकल टेष्ट याइगु जूगु दु। टेष्ट यायेगु निंतिं इपिडिमियोलोजी तथा सरुवा रोग नियन्त्रण महाशाखा (ईडीसीडीं) नेपाल स्वास्थ्य अनुसन्धान परिषद्या स्वीकृति कायेधुंकूगु दु ।
सेरोलजिकल टेष्टं समुदायस्तरय् संक्रमण थ्यंगु वा मथ्यंगु सीके फइगु खँ धाःगु दु। ईडीसीडीया निर्देशक डा. बासुदेव पाण्डेया कथं सेरोलोजिकल टेष्टय् गुलि मनूतय्त दुथ्याकेगु धइगु स्पष्ट मजूनि । तर निवाः तक न्हय्गुलिं प्रदेशया थीथी उमेर समूहया हि संकलन यानाः परीक्षण यायेगु तयारी जुयाच्वंगु दु। थुकी न्हापा परीक्षण यानाः नेगेटिभ वःपितं नं दुथ्याकीगु खँ धाःगु दु ।
स्वनिगः वयेगु पास बन्द
स्वनिगः दुहां वयेत व स्वनिगलं पिहां वनेत जिल्ला प्रशासनपाखें बीगु याना वयाच्वंगु पास आः बन्द याःगु दु । गृह मन्त्रालयया निर्देशन कथं म्हिगःनिसें पास बीगु ज्या बन्द जूगु खँ जिल्ला प्रशासन कार्यालयं धाःगु दु ।
पिने जिल्लां स्वनिगलय् दुहां वइपिंत न्हापा बिया वयाच्वंगु पास नं मेगु व्यवस्था मजूतले खारेज जूगु खँ जिल्ला प्रशासन कार्यालयं धाःगु दु । गृह मन्त्रालयं देय्या ७७ गू जिल्ला प्रशासन कार्यालययात म्हीग बहनी निर्देशन बिसें सवारी पास बन्द याकूगु खः । मन्त्रालयया कथं एम्बुलेन्स, खाद्यान्न ढुवानी, सञ्चार माध्यमयात धाःसा सवारी पास म्वाःगु खँ धाःगु दु ।
LEAVE YOUR COMMENTS