धर्मोदयया ७७ क्वःगु साधारण सभा
येँ(नेपालभाषा टाइम्स)- नेपाःया बौद्ध ख्यःया प्रतिष्ठित व ज्याथःगु संस्था धर्मोदय सभाया ७७ क्वःगु साधारण सभा वंगु शनिवाः जुल । थनया सीतापाइलय् च्वंगु थाङकार देछेन छ्योलिङ महाविहारय् जूगु साधारण सभा नायः बौद्ध विद्वान यज्ञमानपति वज्राचार्यया सभापतित्वय् जूगु खः ।
अखिल नेपाल भिक्षु महासंघ, लामा गुरु व वज्राचार्य गुरुपिंपाखें बौद्ध प्रार्थना वाचन यासें न्ह्याःगु उद्घाटन सत्रय् महासचिव सागरमान वज्राचार्यं लसकुस यानादीगु खः ।
भिक्षु धम्मशोभन महास्थविरं शील प्रदान यासें ज्याझ्वःया उलेज्या यानाबिज्याःगु खःसा मूपाहांकथं संस्कृति, पर्यटन तथा नागरिक उड्डयन मन्त्री जीवनराम श्रेष्ठ झायादीगु खः । ज्याझ्वलय् नवासें मूपाहां मन्त्री श्रेष्ठं भगवान बुद्धया जन्मस्थल लुम्बिनीया समग्र विकासया निंतिं थः दत्तचित्त जुयाः लगे जुयाच्वनागु धासें नेपाःया धार्मिक सांस्कृतिक संवद्र्धनया नापं पर्यटनया विकासया निंतिं नं ज्या न्ह्याकाच्वनागु जानकारी बियादीगु खः ।
उगु इलय् मूपाहां श्रेष्ठं लामा भिक्षु सर्वजित गोम्बा, कुन्गा तेन्जिंग, आनी फुलमायालिसें धर्मोदयया ज्येष्ठ सदस्य ८६ दँया रोजबहादुर गुरुङयात हनापौ देछासे हनेज्या यानादीगु खः । अथे हे सभानायः वज्राचार्यं मूपाहां मन्त्री श्रेष्ठयात मतिनाया चिं लःल्हानादीगु खः ।
ज्याझ्वलय् बागमति प्रदेश सभा सदस्य शोभा शाक्य, निर्वाचत आयोगया आयुक्त जानकीदेवी तुलाधर, धर्मोदयया उपाध्यक्ष पद्मज्योति, उपाध्यक्ष इन्द्रबहादुर गुरुङ लगायतं थःथःगु नुगःखँ तयादीगु खः ।
न्हापांगु सत्रय् केन्द्रीय निर्वाचन समितिया प्रमुख निर्वाचन अधिकृत यज्ञमान शाक्यं धर्मोदयया प्रदेशगत सदस्यय निर्वाचन व वयां लिपा केन्द्रीय समितिइ निर्विरोध जूपिं बाहेकया पदाधिकारीया निर्वाचन जुइगु जानकारी बियादीगु खः । थ्व ल्याखं १८ गते प्रदेशगत सदस्यया निर्वाचन जूगु खःसा १९ गते केन्द्रीय समितिया पदाधिकारी दुजःपिनिगु भृकुटीमण्डपस्थित बुद्ध विहारय् निर्वाचन जूगु खः । मतगणना धाःसा थौं जक जुइगु जूगु दु ।
LEAVE YOUR COMMENTS