खोपया कारणं लुँया भाः कुहांवल

येँ (नेपालभाषा टाइम्स) – कोरोना भाइरस विरुद्ध दयेकाच्वंगु छगू खोप ९० प्रतिशत तक सुरक्षित जूगु खँ पिहां वयेवं विश्वन्यंकं लुँया भाः कुहां वःगु दु । थ्वहे झ्वलय् नेपालय् नं लुँया भाः छतोलाय् हे ३४०० तका कुहां वःगु दु। म्हीग तक तोलाया ९८२०० तका थ्यनाच्वंगु लुँया भाः म्हिगः छक्वलं ९४,८०० तकाय् कुहां वःगु दु । अथेहे छापावाल लुँया भाः नं तोलाया ९७७०० थ्यनाच्वंगुलिइ म्हिगः ९४,३०० तकां कारोवार जूगु दु। वहया भाः नं तोलाय् ७० तका कुहां वयाः छतोलाया १२१५ तका कायम जूगु दु। अमेरिकाया फाइजर व जर्मनीया बायोएनटेक वासः कम्पनीं कोरोनाविरुद्धया खोपं ९० प्रतिशत स्वयां अप्वः मनूतय्त कोरोना संक्रमण मजुइकीगु दावी यायेवं विश्व बजारय् हलचल वःगु खः । थुकिया हे लिच्वः लुँ बजारय् नं लाःगु खः ।