जनता होशियार जुइमाः !

देशय् स्थानीय चुनाव जुइत्यंगु दु । चुनावय् ब्वति काइपिं राजनीतिक दलतय् बारे अनेक दृष्टिकोणं विश्लेषण मूल्यांकन जुयाच्वंगु दु । राजनीतिक विश्लेषक, पत्रकार, विभिन्न संचार माध्यमतय्सं राजनीतिक दलया चिरफार यानाः इमिगु स्थिति बारे जः ह्वलाच्वंगु दु । चुनावया इलय् भोट कुर्कीपिं मतदातातय्त विविध स्रोतं वइगु विश्लेषण, चिरफारं थःगु मत निर्माण, निर्णय यायेगु लागि ग्वाहालि याइ । सचेत याइ ।

थुगुसी स्थानीय चुनाव विशेष व असामान्य खंकाः छथ्वः राजनीतिक मनोचिकित्सकतय्सं हाल राजनीतिक दलतय्के खने दयाच्वंगु असामान्य मनोविज्ञानया मनोविश्लेषण यायेगु क्वःछिउगु दु । पिनें पिनें स्वयेबलय् नेपाःया प्रमुख दलतय्के गाक्कं फुतिफार्ति खनेदइ । ‘जिमिगु दल ऐतिहासिक पार्टी । प्रजातन्त्रया संवाहक’ छगू पार्टीं निरन्तर बकबक यानाच्वनी । मेगु पार्टीं ‘जिपिं महान् क्रान्तिकारी दल, जनआन्दोलनया मुहान’ मदिक्क हालाच्वनी ।

अथे हे छगू निगू पार्टीं देशय् विकास, समृद्धि हयागु जिमिसं खः दावा यानाः चान्हिं गं थानाच्वनी । गुलिं दलतय्सं थःगु हे सुरय् भुनुभुनु हालाच्वनी । जनतां न्यंसां मन्यंसां । थःगु हावादारी बयान त्वःता च्वनी । पिनें पिनें राजनीतिक दलतय्सं थःथःगु हाउभाउ यानाः संवादत त्वःताः जनतायात प्रभावित यायेत स्वयाच्वनी । समर्थन कायेत स्वयाच्वनी । फसे यायेत स्वयाच्वनी ।

तर । मनूत पिनें पिनें छु खने दइ । व हे सक्कल मखु । जुइमखु । मनूया सक्कल सीकेगु खःसा पिनेया स्वरुप खँग्वः जक स्वयां, न्यनां मगाः । वया दुनेया मनस्थिति नं सीकेमाः । दुने नुगलय् न्ह्यानाच्वंगु मनोतरंगयात नं लाये फयेकेमाः । अले जक व मनू सु खः ? म्हसीके फइ । प्रसिद्ध अंगे्रजी नाटककार विलियम शेक्सपियरं छगू नाटकया संवादया झ्वलय् धाइ, ‘छम्ह खलनायक पिनें न्हिली । व न्हिला पिज्वयेका च्वनी । तर व दुनें खलनायक हे जुइ । जुयाच्वनी । पिनेया आवरणं दुनेया मनूया चरित्र क्यनी मखु । शेक्सपियरया धापूया आसय खः । मनोचिकित्सकतय्सं ला मनूया सम्पूर्ण गतिविधि चायेक मचायेकं वया आन्तरिक मनोकारणं निर्णायक भूमिका म्हितीगु खँयात उला क्यनी ।

देशय् राजनीतिक दलतय्के खने दयाच्वंगु विचित्र स्वभाव, रहस्यपूर्ण गतिविधि स्वयाः, खनाः राजनीतिक मनोचिकित्सकतसें थुमित इलय् हे सतर्क यायेमाःगु, उपचारपाखे सचेत यायेमाःगु वाः चायेकी । दलत थौं पीडित जुयाच्वंगु मनोरोगया गम्भिर अध्ययन यानाः इलय् हे उपचार मयाःसा स्वयं दलत जक विनास जुइगु मखु, सम्पूर्ण जनतां हे दुःख सी । मनोचिकित्सकतसें ठहर याइ । चेतावनी बी ।

राजनीतिक मनोचिकि—त्सकतसें थःगु अध्ययन विश्लेषणया प्रतिवेदनय् धाइ, ‘थौं देय्या प्रमुख राजनीतिक दलत थःगु अस्तित्वया चिन्ता, संकटं ग्रस्त जुयाच्वंगु दु । थः सिइन, फुइन धइगु शंका, भयं इपिं चान्हि भयभित जुयाच्वंगु दु । पिनें पिनें ततःधंगु खँ ल्हानाः जनतायात धाकधक्कु त्वःतूसां दलतय् मनोबल तसकं कमजोर जुइधुंकल ।’ उकिं दलतय्सं म्वायेया लागिं सासः थामे यायेया लागि थ्व याये जिउ, व याये जिउ । विचाः मयायेधुंकल । थौं राजनीतिक दलतय्के खनेदयाच्वंगु विक्षिप्त व विकृति इमिगु नुगलय् हरघडी बुया वयाच्वंगु आत्म विनाश, क्षयया त्रास, भय खः ।

थौं देय्या राजनीतिक ख्यलय् खने दयाच्वंगु ‘गठबन्धन’ दलतय्सं पृथककथं म्वायेगु आत्म विश्वासया कमिं पलायन जुइत दयेकूगु जुक्ति जक खः । गठबन्धन निर्माण लिपा थःगु दलया स्वास्थ्य लाभ जूगु खँयात संकेत यासे प्रधानमन्त्री शेरबहादुर देउवां धाइ, ‘झीगु दलयात गठबन्धनं तःधंगु शक्ति प्राप्त याःगु दु ।’ अथे हे मेम्ह नेता प्रचण्डं धाइ, ‘गठबन्धन नीदँ तक न्ह्याइ, पनीम्ह सु ?’

मेखेर प्रतिपक्षी, प्रतिद्वन्द्वी दल एमालेया मनोतनाव गठबन्धन जुइ । गठबन्धन एमालेयात चुनौति जुइ । भय त्रासं एमालेया न्ह्यः स्यंकाबी । नुगः खलबल यानाबी । अय्नं एमालेया नेताज्यू मनोविनादपूर्ण खँ ल्हानाः थःगु दलया भय, त्रास ल्वःमंकेत स्वइ । मन थामे याइ । नुगः वहत याइ । गठबन्धन दुनी । आशा यानाच्वनी ।

दलीय राजनीतिइ दलतय्सं थःगु अस्तित्वया निर्माण, विकास, जनताया विश्वास, पे्रमपाखें आर्जन यायेमाःगु खः । जनता दनलय् अस्तित्वया जग खः । जुइमाः । तर । जनतायात ध्याकुनय् तयाः दलया नेतातय्सं फोहरी स्वार्थी राजनीतियात थःगु कर्म खंकी । उकी हे दुनी । थुकिया प्रमाण थौं देशय् खने दुगु दलतय् सी, म्वायेगु न्ह्यसः जुयाबी ।

गुगुं दलयाके नं थौं जनताया दथुइ वनेगु विशुद्ध आत्म विश्वास मदु । थ्व हे आत्मविश्वासया कमिं यानाः दलतय्सं सिँ न्हाय् छुनाः अनेक छलछामया हर्कत क्यनाः जनताया न्ह्यःने वनी । ततःधंगु वाचा याइ । झूठया खेती याइ । राजनीतिक मनोचिकित्सकतय्सं थौंया राजनीतिक दलतय् हीनताबोधयात उला बी । हीन मानसिकतां ग्रस्त दलतसें न्ह्यागुं यायेफु । जनता होशियार जुइमाः । राजनीतिक मनोचिकित्साविदतय्सं धाइ ।

सम्बन्धित बुखँ

LEAVE YOUR COMMENTS