जिं विपक्षी मानसिकतां उम्मेदवारी बियागु मखु

छिगु मू मू एजेन्डा छु छु खः ?
वडाया प्रशासनिक ज्यायात पूर्वाग्रह मतसे उद्धार व पारदर्शी रुपं सेवाग्राहीयात सेवा बीगु । वडाय् सेवाय् सुशासन कायम यायेगु । भौतिक निर्माण व विकास निर्माणया ज्यायात पक्षपात मयासे समानुपातिक रुपं कार्यान्वयन याना यंकेगु जुइ ।

छिगु वडाय् दुगु मुख्य समस्यात छु छु खः ?
अव्यवस्थित पार्किङ, सहरी सुन्दरता कुरुप जुइक तयातःगु तारया व्यवस्थापन, वडाया गल्ली गल्लीइ, बहाः बही, चुक, ननिइ मतया व्यवस्थापन । लः, धः व फोहरया समुचित व्यवस्थापन मुख्य समस्या खः ।

छि निर्वाचित जुयादी धइगु आधार छु दु ?
जिं विपक्षीया मानसिकतां उम्मेदवारी बियागु मखु धइगु स्पष्ट यानाच्वना । जि वडाया सामाजिक संस्थाय् च्वनाः क्रियाशील जुयाच्वनाम्ह व्यक्ति । जिगु सामाजिक ज्या खनाः यक्व मनूत लय्ताः । प्रचार प्रसार नं उत्साहपूर्वक हे जुयाच्वंगु दु । वडावासीं चाहना यानाच्वंगु परिवर्तनया निंतिं जितः भोट बियाः त्याकी धइगु विश्वास दु ।

निर्वाचित जुयादिल धाःसा दकलय् न्हापां छु यानादी ?
वडा दुने च्वंपिं थीथी जातजातिया पहिचान कायम यायेगु व कमि कमजोरीयात न्हंका वनेगु जुइ । छगूकथं मापदण्ड कायम यानाः प्रचलित मूल्य व मान्यता कथं ज्या याना वनेगु जुइ । अव्यवस्थित जुयाच्वंगु पार्किङ, फोहर, लः व धःया समस्या समाधानया निंतिं कार्ययोजना दयेकाः वनेगु जुइ ।

स्थानीय भाषा, कला, संस्कृतिया उत्थानया निंतिं छिगु ग्वसाः छु दु ?
वडाय् च्वंगु सरकारी व निजी ब्वनेकुथिइ नेपालभाषां आखः ब्वंका वयाच्वंगुयात अझ थप परिस्कृत यानाः व्यवस्थित याना यंकेगु जुइ । वडाया निंतिं वइगु बजेटयात स्थानीय कला, संस्कृतिया निंतिं नं विनियोजन यानाः संरक्षणया निंतिं पलाः न्ह्याके ।