
ख्वप – बागीश्वरी माध्यमिक विद्यालयया हिरक जयन्ती दँ–२०७५या लसताय् विद्यालयय् अध्ययन याःपिं पुलांपिं विद्याथीतय् छगू भेला जुल । विद्यालयया हिरक जयन्तीया लसताय् २०४० निसें २०५० साल तक एसएलसी समूहया पूर्व विद्यार्थीतय् भेला जूगु खः ।भेलाय् विद्यालय व्यवस्थापन समितिया नायः रविन्द्र ज्याख्वं बागीश्वरी स्कुलयात अझ प्रगतिया लँपुइ च्वन्ह्याका यंकेत विद्यालयय् अध्ययन याःपिं सकलें विद्यार्थीतय्सं ग्वाहालि यायेमाःगु खँय् बः बियादिल ।
बागीश्वरीपाखें उत्पादन जूगु जनशक्ति वर्तमान अवस्थाय् देय्या थीथी पदय् च्वनाः जिम्मेवारी पूवंकाच्वंगु व वर्तमान परीक्षाया लिच्वः नं उत्साहजनक जूगुलिं नं बागीश्वरीया स्थिति न्हाय्कं थें स्पष्ट जूगु वय्कःया धापू दु ।वय्कलं विद्यालयया हिरक जयन्ती दँया लसताय् दछियंकं थीथी ज्याझ्वः याना वनेगु व थ्व झ्वलय् झिंनिलाया झिंनिगू हे महत्वपूर्ण ज्याझ्वः याना वनेगु व्यवस्थापन समितिया निर्णयकथं हे उगु ज्याझ्वः जुयाच्वंगु जानकारी नं बियादीगु खः ।
विद्यालयया पूर्व प्रधानाध्यापक मोहनप्रसाद प्रजापतिं विद्यालयया स्थितिबारे प्रष्ट यासें वागीश्वरी कलेजं हालय् जक न्याःगु १ रोपनी ७ आनाः जग्गाय् भवन निर्माण प्रक्रिया न्ह्याः वनाच्वंगु जानकारी बियादिल । वय्कलं विद्यालयपाखें आतकया दुने प्यद्वः स्वयां अप्वःविद्यार्थीं एसएलसी उत्तीण यायेधुंकूगु जानकारी नं बियादीगु खः ।
विद्यालयया प्रधानाध्यापक कृष्णप्रसाद धन्छाया सभापतित्वय् जूगु ज्याझ्वलय् वागीश्वरी कलेजया प्राचार्य धनकुमार श्रेष्ठ, सहायक प्रधानाध्यापक ज्ञानसागर प्रजापति, शिक्षक विश्वेश्वर मानन्धरलिसें पुलांपिं विद्यार्थीतय्सं नं थःथःगु विचाः तयादीगु खः । ज्याझ्वलय् विद्यालयया पुलांपिं विद्यार्थीतय्त मूपाहां ज्याख्वं मतिनाया चिं लःल्हानादीगु खःसा पुलांपिं विद्यार्थीतय्सं नं विद्यालययात लमुन्ति चिं लःल्हाःगु खः ।
LEAVE YOUR COMMENTS