वा व चलखय् लानाः सीपिं २१९ म्ह थ्यन

येँ(नेपालभाषा टाइम्स)÷ वंगु बिहीवाः निसें स्वन्हु तक वःगु वा व चलखय् लानाः सीपिनि ल्याः २१९ म्ह थ्यंगु दु । नेपाल प्रहरी प्रधान कार्यालयया कथं स्वनिगःया येँ, यल व ख्वप सहित २२ गू जिल्लाय् यानाः थुलि मनूतय् ज्यान वंगु खः । विपदं दकलय् अप्वः मानवीय क्षति काभ्रे, यल व धादिङ जिल्लाय् जूगु दु । काभ्रेय् ६५ म्ह, यलय् ४० म्ह, धादिङय् ३९ म्ह व येँ १७ म्ह सीगु दु । उकथं हे मकवानपुरय् न्हय्म्ह, पाँचथरय् खुम्ह, ख्वप व सोलुखुम्बुइ न्याम्ह न्याम्ह, सिन्धुली स्वम्ह, झापा, धनकुटा, महोत्तरी, रौतहट व रुपन्देहीइ निम्ह निम्ह सीगु दुसा उदयरपुर, ओखलढुंगा, सप्तरी व रामेछापय् छम्ह छम्ह सीगु दु । विपदय् लानाः २७ म्ह बेपत्ता जुयाच्वंगु दुसा १५६ म्ह घाःपाः जूगु दु ।