हानं लोडसेडिङ शुरु

येँ – म्हिगःनिसें नेपाल विद्युत प्राधिकरणं औद्योगिक ग्राहकया नितिं लोडसेडिङ घोषणा याःगु दु । आन्तरिक माग पूर्ति यायेगु निंतिं मत म्हो जूगु व भारतं तकं मत हयेमफुगुलिं लोडसेडिङ यायेमाःगु खँ प्राधिकरणं धाःगु दु । औद्योगिक क्षेत्रय् लोडसेडिङ याःसां घरायसी व सामुदायिक ग्राहकया नितिं धाःसा लोडसेडिङ मजुइगु खँ धाःगु दु ।

नेपाल विद्युत प्राधिकरणया कथं वइगु बाःछिया नितिं औद्योगिक क्षेत्रय् लोडसेडिङ यायेमालेफु । वयां लिपा नेपालय् मत उत्पादन जुयाः आः औद्योगिक क्षेत्रय् याःगु लोडसेडिङ चीके फइगु खँ धाःगु दु । प्राधिकरणया कार्यकारी निर्देशक कुलमान घिसिङं न्हिनय् औद्योगिक क्षेत्रय् लोडसेडिङ मजुइगु तर पिक इलय् व चान्हय् धाःसा गुगु उद्योगय् गुलि ई तक मत वनीगु खः उकिया जानकारी उद्योगयात बीगु जुइ

धयादिल ।
प्राधिकरणया कथं थौंकन्हय् नेपालय् ३०० मेगावाट मत मगानाच्वंगु दु । भारतया विहार राज्य व इन्डियन इनर्जी एक्सचेन्ज (आईईएक्स) मार्केटपाखें नं मत मवःगुलिं लोडसेडिङ यायेमाःगु अवस्था वःगु खः । प्राधिकरणं भारतपाखें ५०० मेगावाट मत न्यायेत स्वःगु खःसां नं भारतय् मतया अभाव जूगुलिं लोडसेडिङ यायेत प्राधिकरण बाध्य जूगु खँ धाःगु दु ।

सम्बन्धित बुखँ

LEAVE YOUR COMMENTS