‘तोडफोड यानाः जय नेवाः ?’

येँ – येँ महा–नगरपालिकाया मेयर विद्यासुन्दर शाक्यं भीड मुनाः सार्वजनिक सम्पत्ति तोडफोड यायेगु अले वने त्ययेकाः ‘जय नेवाः !’ धाधां ब्वाँय् वनेगु ज्यापाखें अन्ततः नेवाःतय्त हे हानी जुइगु खँ कनादीगु दु । वय्कलं धयादिल, ‘न्हापा न्हापा माओवादी कार्यकर्तातय्सं नं पार्टीया निर्देशन दुसां मदुसां जनताया छेँ लुटे यायेगु अले वने त्ययेकाः ‘माओवादी जिन्दावाद !’ धकाः बिसिउँ वनेगु ज्या याःगु कारणं उपिं जनताया दथुइ बदनाम जुल ।

वहे ज्या आः नेवाः ख्यलय् जुयाच्वंगु दु । उकी झी सचेत जुइमाः ।’म्हिगः थनया १५ वडाय् लाःगु लखतीर्थ पुनर्निर्माणया जग स्वनेगु ज्याझ्वलय् न्ववासें वय्कलं थ्व खँ धयादीगु खः । वय्कलं थौंकन्हय् मनपां याइगु न्ह्यागु ज्याय् नं पंगः थनाः ज्या याके मबीगु पुचः सक्रिय जुयाच्वंगु खँय् नं गुनासो प्वंकादिल ।

नेपाल संवत्या प्रणेता शंखधर साख्वाःलिसे नं स्वापू दुगु लखतीर्थ पुन–र्निर्माणया जग स्वनेगु उगु ज्याझ्वलय् वडा अध्यक्ष ईश्वरमान डंगोल, पुलांम्ह सांसद लक्ष्मीदास मानन्धर, पुनर्निर्माण समितिया संयोजक सुवर्ण डंगोलपिंसं नं नुगःखँ प्वंकादीगु खः । लखतीर्थ पुनर्निर्माण यायेत येँ मनपां ५० लाख तका बजेट फ्याःगु दु ।