चाबही गणेद्यःया जग्गा समूहपाखें उपभोग

येँ (नेपालभाषा टाइम्स) – चाबही गणेद्यःया जग्गा छथ्वः सीमित समूहपाखें उपयोग याना वयाच्वंगु सीदुगु दु। येँ महानगरपालिका वडा नं. ७ चाबहिस्थित चाबही गणेद्यःया जग्गा दयेकातःगु पसः चन्द्र विनायक पार्क व्यवस्थापन समाजं म्हयेगु याना वयाच्वंगु दु ।

२०५४ सालनिसें गैरसरकारी संस्थाया रुपय् स्थापना यानातःगु समाजं चाबही गणेद्यः चौरय् करिब ४ रोपनी जग्गाय् सछिगू पसः कवः दयेकाः बाः कयावयाच्वंगु खः । पशुपति क्षेत्र विकास कोष दुने लाःगु उगु थासय् च्वंगु देगः, मठमन्दिर व उकिया नामय् दुगु सम्पत्तिया संरक्षण यायेगु कानूनी अधिकार कोषयात दुसां थुखेपाखे धाःसा खास हे ध्यान बिया मच्वंगु स्थानीवासीं धाःगु दु ।

उद्यानया नामं संस्था चायेकाः १०० गू स्वयां अप्वः पसः व्यवस्थापन याना वयाच्वंसां सरोकार निकायं थुखेपाखें ध्यान मबिउगु जक मखु उगु समाजय् चाबहीया स्थानीयवासीयात सदस्यतातकं बीगु यानाच्वंगु मदु। तरकारि पसःयात लय् झिंन्यासः व कापः पसःयात लय् गुसःतकां बालं बियातःगु उगु थासय् निगुलिं पसः बछि बछि संचालन जुयाच्वंगु दु ।