६ लाख तक संक्रमित थ्यनी – स्वास्थ्य मन्त्री

येँ- स्वास्थ्य तथा जनसंख्या मन्त्री हृदशेष त्रिपाठीं नेपालय् वइगु जेठ व असार महिना तकया दुने कोरोना भाइरस संक्रमितया ल्याः उच्च दरय् थ्यनीगु खँ धयादीगु दु । वय्कःया कथं उगु इलय् तक संक्रमित ल्याः न्हिं ११ हजार तक थ्यनीगु व सक्रिय संक्रमित ६ लाख तक थ्यनी ।

स्वास्थ्य पत्रकार मञ्चं मंगलवाः ग्वसाः ग्वःगु ज्याझ्वलय् न्ववायेगु झ्वलय् मन्त्री त्रिपाठीं कोरोना संक्रमणया जोखिम तसकं अप्वया वनाच्वंगुलिं एन्टिजेन परीक्षण यायेगु ज्या अप्वयेकागु खँ नं धयादीगु दु । वय्कलं ज्याझ्वलय् न्ववायेगु झ्वलय् धयादिल, ‘जेठ असार तक कोरोना संक्रमितया ल्याः उच्चतम बिन्दुइ थ्यनीगु अनुमान यानागु दु, न्हिं ११ हजार थ्यने फइगु व सक्रिय संक्रमण ६ लाख तक थ्यनीगु प्रक्षेपण यानागु दु, तर अज्याःगु अवस्था वयेके मबीगु कुतः सरकारं यानाच्वंगु दु ।’

नेपालय् कोरोना भाइरसया संक्रमण अप्वया वनाच्वंसां नं ‘लकडाउन’ यायेगु बारे सरकारं बिचाः मयाःनिगु खँ नं वय्कलं धयादीगु दु । वय्कलं धयादिल, ‘दछिया अनुभव, तयारी व पूर्वाधार दु, उकियात प्रभावकारी दयेकाः लकडाउन मजुइकेगु कुतः यायेगु जुइ ।’

वय्कलं स्वनिगलय् ७ निसें ८ लाख विद्यार्थी दुगु व शहरी क्षेत्रय् अनलाइन कक्षा सञ्चालन यायेत मन्त्रालयं प्रस्ताव यानागु जानकारी नं बियादीगु दु । पत्रकारपिं लिसे खँ ल्हायेगु झ्वलय् वय्कलं भाइरसया न्हूगु भेरिएन्ट खनेदुगु व उकिया लिच्वः कथं ल्याय्म्हपिं लिसे म्हो उमेरया मस्त प्रभावित जुयाच्वंगुलिं जोखिम खनेदुगु खँ धयादिल ।

वय्कलं झिंच्यादँ क्वय्यापिनिगु नितिं खोप तयार मजूगुलिं यानाः लछि तक स्कुल बन्द यायेगु प्रस्ताव नं तयादीगु दु ।
मन्त्री त्रिपाठी धयादिल, ‘झिंच्यादँ क्वय्यापिनिगु निंतिं खोप तयार मजूनि अथे जुयाः आः अप्वया वनाच्वंगु न्हूगु भेरियन्टयात पनेगु निंतिं नं लछि तक स्कुल बन्द यायेगु पाय्छि जुइ ।’

वय्कलं झिंच्यादँ स्वयां क्वय्यापिंत अझ नं खोप मदुगुलिं यानाः ग्यानापूगु अवस्था दुगुलिं पूर्व तयारीइ सरकारं ध्यान बियाच्वनागु खँ नं धयादिसें नाकाय् द्वःछि स्वयां अप्वः मनूतय्त तयेफइगु कथं होल्डिङ सेन्टर दयेकेगु ज्या जुयाच्वंगु जानकारी नं बियादीगु दु ।

थ्वहे झ्वलय् म्हिगः जक देय्न्यकं ४६० म्हेसित कोरोना भाइरस संक्रमित जूगु दु । स्वास्थ्य मन्त्रालयं बिउगु जानकारी कथं म्हिगः ४३८३ म्हेसिया पीसआर परीक्षण याःगु खः ।

सम्बन्धित बुखँ

LEAVE YOUR COMMENTS