विद्युतीय संचारमाध्यमय् आचारसंहिता उल्लंघन अप्वल

येँ – प्रेस काउन्सिल नेपालय् वंगु स्वलाया दुने पत्रकार आचारसंहिता उल्लंघनया न्यय्छगू उजुरी दुहां वःगु खँ सीदुगु दु । दुहां वःगु उजुरीमध्ये दकलय् अप्वः विद्युतीय संचारमाध्यम सम्बन्धी लानाच्वंगु दु । प्रेस काउन्सिलं बिउगु जानकारी कथं चालु आर्थिक दँया वंगु साउननिसें असोज मसान्ततकया दुने दुहां वःगु उजुरीमध्ये विद्युतीय संचारमाध्यमय् स्वीन्हय्गू दुसा छापा माध्यमय् झिंप्यंगू दु ।

काउन्सिलया निमित्त मुख्य अधिकृत नापं सूचना अधिकारी दीपक खनालं बियादीगु जानकारीकथं स्वलाया अवधिइ काउन्सिलय् विद्युतीय माध्मययात कयाः दुहां वःगु स्वीन्हय्गू उजुरीमध्ये झिंछगू फछ्र्यौट जूगु व नीखुगू कारवाही प्रक्रियाय् लानाच्वंगु दु । अथे हे छापा संचारमाध्यमयात कयाः दुहां वःगु झिंप्यंगू उजुरीइ प्यंगू फछ्र्यौट जूगु व झिगू कारवाही प्रक्रियाय् वनाच्वंगु वय्कलं जानकारी बियादीगु दु ।

काउन्सिलय् दुहां वःगु उजुरीइ अप्वःथें फय्गं समाचार प्रकाशन, प्रशारण याःग, चरित्र हत्याया कुतः याःगु व मानहानी थेंज्याःगु मुद्दा लानाच्वंगु दु । काउन्सिलया कथं तुलनात्मक रुपं पत्रकार आचारसंहिता उल्लंघनया घटनायात कयाः उजुरी यायेगु क्रम अप्वया वंगु दु ।

खनालया कथं पत्रपत्रिका, रेडियो, टेलिभिजन, अनलाइन संचारमाध्यम मध्ये दकलय् अप्वः अनलाइन संचारमाध्यमं आचारसंहिता उल्लंघन यायेगु क्रम अप्वया वनाच्वंगु दु । वय्कःया कथं २०७४ साल माघनिसें अनलाइनपाखें नं उजुरी याये दइगु व्यवस्था यायेवं उजुरी याइपिं अप्वया वनाच्वंगु दु ।

सम्बन्धित बुखँ

LEAVE YOUR COMMENTS