यल महानगरय् नं नेपालभाषा ब्वंकेगु शुरु

यल (नेपालभाषा टाइम्स)- यल महानगरपालिकाया स्कुलय् नं म्हिगःनिसें नेपालभाषाया माध्यमं स्थानीय विषय ब्वंकेगु शुरु जूगु दु । थनया आदर्श कन्या निकेतन माविइ म्हिगःनिसें नर्सरीनिसें स्वंगू तगिं तक नेपालभाषाया माध्यमं स्थानीय विषय ब्वंकेगु ज्या शुरु जूगु खँ स्कुलया प्रधानाध्यापक शैलेश प्रधानं कनादिल ।

यल महानगरपालिकां तयार याःगु पाठ्यक्रम कथं नेवाः कार्टुन लगायतया शिक्षण सामग्री छ्यलाः अन ब्वनेज्या शुरु याःगु खः । यल मनपा १२ वडा अध्यक्ष नारायण अवालें मस्तलिसे नेवाः भासं खँ ल्हानाः कक्षा शुरु यानादीगु खः ।

ज्याझ्वलय् प्रा. तुल्सीलाल सिं, ज्यापु समाजया सबिना महर्जनपिनि नं उपस्थिति दुगु खः ।