पहिचानया लागिं न्हय्न्हु तक धर्ना

येँ – प्रदेशतय् नामाकरण याइबलय् पहिचानया आधारय् नेवाः, तामाङसालिङ, शेर्पा, लिम्बुवान, किरात÷खम्बुवान, मधेश व दलित शिल्पीया गैर भौगोलिक नां तयेत माग यासें ‘पहिचानय् आधारित संघीय गठबन्धनं’ छवाःयंकं धर्ना बीगु जूगु दु । उकिया न्हापांगु न्हि कथं म्हिगः थनया न्हू वानेश्वर पिने धर्ना बीगु ज्या जुल ।

गठबन्धनपाखे थुकिया बारे गृहमन्त्री रामबहादुर थापा बादलयात वंगु जेठ १० गते हे नापलासें छगू ज्ञापनपौ समेत बिउगु खः । म्हिगः पहिचानय् आधारित संघीय गठनबन्धनय् आवद्ध राजनीतिक पार्टीतय्सं न्हू वानेश्वरय् लँय् च्वनाः नाराबाजी समेत याःगु खः । थ्व गठबन्धनपाखें सरकार समक्ष पहिचानजन्य झिगू माग न्ह्यब्वःगु दु ।

सरकारं घोषणा यायेधुंकूगु गण्डक, कर्णाली व सुदूरपश्चिम धाःगु नां खारेज यानाः उकिया थासय् छसिकथं तमुवान–मगरात, थरुहत व खसान नां तयेत नं माग याःगु दु ।अथे हे नेपाः उपत्यका दुने अप्वयाच्वंगु जनसंख्याया चाप नियन्त्रण यायेमाःगु माग यासें थन दुने न्हूगु शहर दयेकेगु योजना लित का धकाः नं माग यानातःगु दु ।

अथे हे येँ देय्या नेवाःतय्गु जग्गा, भाषा व सम्पदाय् जुयाच्वंगु अतिक्रमण तुरुन्त दिकेत नं उकी माग यानातःगु दु । तामाङ समुदाययात राज्यं छुं नं सरकारी ज्याय् जागिर मबीगु व्यवस्था यानातःगु जुयाः थुकिं यानाः तामाङ समुदाययात तःधंगु लिच्वः लाःगु जुयाः राज्यं थुकिया लागिं तामाङ समुदाययाके क्षमा फ्वँसें क्षतिपूर्ति समेत बीमाः धकाः नं माग यानातःगु दु ।

अथे हे थारू नेता रेशम चौधरीयात तुरुन्त त्वःतेमाःगु, वर्तमान ७ प्रदेशया पलेला १० प्लस १ प्रदेश दुगु राज्य व्यवस्था लागू यायेमाः लिसें सकलें पहिचानवादीत छथाय् तयाः राज्यं गोलमेल सम्मेलन आयोजना यायेमाःगु मा नं उकी यानातःगु दु ।

पहिचानय् आधारित संघीय गठबन्धनय् नेपाः राष्ट्रिय पार्टी, नेवाः राजनीतिक अभियान, नेपाल सांस्कृतिक पुनर्जागरण अभियान, खसान राष्ट्रिय संघर्ष समिति, नेपाल लोकतान्त्रिक पार्टी, खम्बुवान राष्ट्रिय मोर्चा, आदिवासी जनजाति पार्टी ेनेपाल सम्बद्ध तामाङसालिङ–नेवाः संघर्ष समिति, माननीय रेशम चौधरी रिहाइ अभियान, संघीय लोकतान्त्रिक राष्ट्रिय मञ्च आवद्ध थीथी मञ्चत दुथ्याः ।

थ्व गुंगुलिं संगठनया नायःतय्सं हस्ताक्षर यानाः पिकाःगु मंकाः वक्तव्यय् थ्व माग पूरा याकेगु लागिं थःपिंसं न्हय्म्हु तक लगातार हे धर्ना बीगु कार्यक्रम तयातःगु खः ।

सम्बन्धित बुखँ

LEAVE YOUR COMMENTS