न्हय्न्हुयंकं जूगु अन्तर्राष्ट्रिय नेपालभाषा साहित्य सम्मेलन

येँ- हलिं नेवाः गुथिया ग्वसालय् वंगु भदौ १ गतेनिसें ७ गते तक तःजिक न्हय्न्हुयंकं अन्तर्राष्ट्रिय नेपालभाषा साहित्य सम्मेलन क्वचाःगु दु । ईयात ल्वयेक न्हूगु प्रविधियात छ्यला जुमय् याःगु उगु सम्मेलनं नेपाःया साहित्यया इतिहासय् न्हून्हूगु कथंया कीर्तिमान कायम यायेगु नाप नापं जनकवि दुर्गालाल श्रेष्ठयात नोवेल साहित्य सिरपाःया नितिं माःगु कथंया पहलकदमि यायेगु कथंया घोषणा तकं याःगु दु ।

वाङमय शताब्दी पुरुष सत्यमोहन जोशीया मूपाहांसुइ भदौ १ गते उद्घाटन समारोह जुया न्हिया न्हिथं साहित्य सम्मेलन जूगु खःसा दक्ले लिपां दिं भदौ ७ गते समापन समारोहसं जनकवि दुर्गालाल श्रेष्ठायात नोबेल साहित्य सिरपाः बिइमाःगु खँ तसें वय्कलं साहित्य ख्यलय् यानादीगु योगदानया चर्चा तकं यायेगु ज्या जूगु खः ।

नेपाःया सुं नं ब्यक्तियात आः तक नोबेल पुरस्कार मलानीगु अवस्थाय् नेपालभाषाया साहित्यकार दुर्गालाल श्रेष्ठ उगु सिरपाः काये बहःम्ह ब्यक्तित्व खःधासें वय्कलं च्वयादीगु साहित्ययात भाय् हिलाः अंग्रेजी भासं, कोरीयन भासं तकं न्यंकादीगु खःसा अथे हे खय् भाय्या म्ये तकं न्यंकेगु ज्या जूगु खः । जनकवि दुर्गालाल श्रेष्ठयात युग कविया रुपय् चित्रणयासें वय्कलं साहित्य ख्यलय् यानादीगु योगदानयात कया थीथी ब्यक्तित्वपिन्सं बिचाः प्वंकेगु नाप नापं कलाकारपिन्सं म्ये हाला न्यंकादीगु खः ।

साहित्य सम्मेलनया झ्वलय् नेपालभाषा साहित्य सम्मेलनयात अन्तर्राष्ट्रिय करण भाषाया ल्याखं नं यायेगु आज्जु तया नेपालभाषाया साहित्ययात भाय् हिलाः खय् भासं, अंग्रेजीभासं, डच भासं, जापानी भासं, रुसी भासं, स्पेनीज भासं अले पोर्चुगिज भासं तकं ब्वनेगु ज्या जूगु दु धकाः अन्तर्राष्ट्रिय नेपालभाषा साहित्य सम्मेलनया कजि श्रीकृष्ण महर्जनं कनादीगु दु । वय्कलं दक्ले यक्व अन्तर्राष्ट्रिय भासं नेपालभाषाया साहित्ययात भाय् हिला ब्वनेगु याःगु ल्याखं जक मखु आ: तकया दुने दक्ले अप्वः साहित्यकारपिं सच्छि व नीन्याम्हसिबें अप्वःसिनं ब्वति काःगु नापं झिंस्वंगू देशसं ब्वति काःगु ल्याखं नं न्हूगु कीर्तिमान कायम जूगु दु धकाः कनादिल । न्हापां न्यान्हु जक यायेगु धकाः घोषणा यानागु जूसां नं साहित्यकारपिनिगु मागयात ध्यानय् तया न्हय्न्हु तक यायेमाःगु अवस्था ब्वलंगु खः धकाः नं वय्कलं कनादीगु दु ।

अन्तर्राष्ट्रिय नेपालभाषा साहित्य सम्मेलनय् पीम्हं मल्याक थीथी देय्यापिं कालाकारपिन्सं नेवाः म्ये हालादीगु अले न्हूपिंनिसें पुलांपिं साहित्यकारपिन्सं ब्वति कयादीगु, नेवाः मखुपिं नेपाःया थीथी आदिवासी जनजातिनिसें खस आर्य समुदायपिन्सं तकं नेपालभाषां साहित्य च्वया ब्वति कयादीगु खः धकाः नं धाःगु दु । आः थुगु सम्मेलनय् दुथ्याःगु रचनायात मुना नेपालभाषां, खय् भासं, अंग्रेजीभासं नापं रुसी भासं तकं भाय् हिला इ–सफू नापं सफूया रुपय् नं पिथनेगु ग्वसाः दु धकाः हलिं नेवाः गुथिं धाःगु दु ।

सम्बन्धित बुखँ

LEAVE YOUR COMMENTS