अनियमितता जूगु धासें असन्तुष्टि

थिमि – मध्यपुर थिमि नगरपालिकाय् संचालन जुयाच्वंगु योजनायात कयाः स्थानीयवासीतय्सं असन्तुष्टि प्वंका हःगु दु । नगरपालिकां संचालन यानाच्वंगु योजनाय् अनियमितता जूगु धासें स्थानीवासीं असन्तुष्टि प्वंकाहःगु खः । नगरपालिकाया वार्षिक नीति तथा कार्यक्रम व बजेटय् विनियोजन मजूगु योजना संचालन जुयाच्वंगु व उकी अनियमितता जूगु धासें असन्तुष्टि प्वंकूगु खः ।

योजना संचालन यायेत नगरपालिकां लागत इष्टिमेट तयार मयासे उपभोक्ता समितिलिसे सम्झौता यानाः पेश्की बीगु व आर्थिक ऐन नियम व सार्वजनिक खरिद ऐनयात तकं पालना मयाःगु खँ सीदुगु दु । नगरपालिकां उकिया अःखः उपभोक्ता समितिपाखें ज्या याका वयाच्वंगु कर्मचारी स्रोतया दावी दु ।

नगरप्रमुख मदनसुन्दर श्रेष्ठं थः यथे मनोमानी धंगं तोक आदेशया भरय् पेश्कीया निंतिं दवाब बीगु, योजना संचालन यायेगु याना वयाच्वंगु स्रोतं दावी याःगु दु ।स्रोतयाकथं योजनाया इष्टिेमट तकं तयार मयासें नगरपालिकां पेश्की बियाः सम्पन्न याःगु छगू योजना निगू पुखूया पुनःनिर्माण खः ।

वंगु बिस्काः जात्राया इलय् पुखुलिइ लः जायेकेगु लक्ष्ययालिसें ज्या शुरु याःगु उगु योजना धाःसा लक्ष्यकथं हे क्वचायेधुंकूगु दु । तर उकिया लागत इष्टिमेट धाःसा वंगु बैशाख २४ गते जक तयार जूगु स्रोतं कंगु दु । थुकथं हे बालकुमारिया देगः जिर्णोद्वारय् नं अनियमित तरिकां पेश्की बिउगु स्रोतया दावी दु ।

देगः पुनःनिर्माणया निंतिं इष्टिमेट तयार मयासे ९८ गू लाख तका लागत तुइगु अनुमान यााः नगरपालिकां योजना हे स्वीकृत मजुइकं उपभोक्ता समितियात २० गू लाख पेश्की बीगु स्रोतं कंगु दु । उगु देगः बिस्काः जात्राया निंतिं सम्पन्न यायेगु लक्ष्य कयातःगु खःसां आतक नं पूवंके फुगु धाःसा मदुनि ।