ने. सं. ११४४ चौलागा अष्टमी -

नेपालय् दकलय् अप्वः येँय् संक्रमितत लुल, स्वनिगःया मेयरपिनि मंकाः बैठक

येँ (नेपालभाषा टाइम्स) – स्वनिगलय् कोरोना संक्रमण जूपिं धमाधम अप्वया वयेवं थुकियात अझ न्यंका मछ्वयेगु उपाय बारे सहलह यायेत स्वनिगःया नगरपालिका फोरोमया स्वम्ह पदाधिकारीतय् मुँज्या च्वंगु दु ।

म्हिगः थनया राष्ट्रिय सभागृहय् फोरमया नायः लिसें येँ मनपाया मेयर विद्यासुन्दर शाक्य, न्वकु लिसें यल महानगरपालिकाया मेयर चिरिबाबु महर्जन व छ्यांज्ये लिसें मध्यपुर थिमि नगरपालिकाया मेयर मदनसुन्दर श्रेष्ठया दथुइ उगु मुँज्या जूगु खः । खास यानाः पिनेयापिं मनूत दुहां वयेवं स्वनिगलय् संक्रमण अप्वया वंगु खँय् चिउताः प्वंकुसें वय्कःपिंसं आः थःपिंसं गज्याःगु पलाः ल्ह्वने माली धकाः सर्वसाधारणया नं बिचाः कायेगु निर्णय याःगु खः । स्थिति भयावह जुया वनीगु खने दयेवं स्वनिगलय् लकडाउन जुइगु हुइनाभुइना व्यापक रुपं जूसां स्थानीय तहपाखें अज्याःगु छुं निर्णय धाःसा याःगु मदुनि ।

थ्वहे झ्वलय् वंगु २४ घौया दुने स्वनिगलय् जक ६२ म्ह न्हूपिं संक्रमित लुया वःगु दु। थुकी मध्ये येँ जिल्लाय् जक ५६ म्ह लूगु खः । उकी यल व ख्वपयापिं स्वम्ह स्वम्ह दुथ्याः । म्हिगः देय्न्यंकं हे दकलय् अप्वः कोरोना न्हूपिं संक्रमितत लूगु येँय् हे खः । निगू थासय् पर्सा लाःगु दु गन ५५ म्ह लूगु खःसा अनं लिपा बाँकेय् ४९ म्ह व मोरबय् ३७ म्ह संक्रमित लूगु खः । म्हिगः देय्न्यंकं ३७८ म्ह न्हूपिं लूगु खः । आः तक ७३ म्हेसिया ज्यान वनेधुंकूगु दुसा १६ हजार ३१३ म्ह ल्वय् लंकाः लिहां वंगु दु ।

वटु-महाबौद्ध व नरः नं सिल
येँ मनपा २२ वडाय् लाःगु वटु-महाबौद्ध लागाय् कोरोना संक्रमित मनूत लुया वयेवं उगु लागाय् थौं नं बजाः चायेके मबिसे सिल याइगु जूगु दु । वडा २२ या वडा अध्यक्ष चिनकाजी महर्जनं कनादी कथं आः थ्व लागाया स्थानीय मनूतय्गु पीसीआर परीक्षण याकेगु ग्वसाः जुयाच्वंगु दु । सम्भवतः मंगलवाःपाखे थ्व परीक्षण यायेगु ज्या जुइफु । पीसीआर परीक्षण यानाः उकिया लिच्वः पिहां मवःतले थ्व लागा बन्द हे यायेगु जुइ ।

आःयात वटु, महाबौद्ध, गुचात्वाः आदि लागा बन्द यायेगु ग्वसाः जुयाच्वंगु दु। शुक्रवाः उगु क्षेत्रय् कोरोना संक्रमित मनूत खने दयेवं संक्रमण मेथाय् न्यना मवनेमा धकाः बजाः बन्द याकूगु खः । थ्व क्षेत्रय् आः तक निम्ह कोरोना संक्रमित लुया वयेधुंकूगु दु। उखे वडा ५ या नरलय् नं छक्वलं च्याम्ह संक्रमित लुया वयेवं म्हिगः कोटाल त्वाः सिल याःगु दु ।