नेपालय् ओली सरकारयात कयाः भारतय् वहस
येँ – प्रधानमन्त्री केपी ओलीया नेतृत्वय् गठन जूगु सरकारं पूर्ण रुप अझ नं मकाःनि । अथे खःसां ओली नेतृत्वया थ्व सरकारयात कयाः भारतय् धाःसा तःधंगु हे बौद्धिक वहस शुरु जूगु दु । ओली नेतृत्वया थ्व सरकारं ज्या शुरु यायेवं आः थ्व नं श्रीलंका थें हे भारतया ‘मुठ्ठीं’ मुक्त जुया वनीगु टिप्पणी भारतय् याना हःगु दु । नेपाःया राजनीतिक विकासक्रमयात सतिक ज्वनाः अध्ययन यानाच्वंपिं बुद्धिजीवीतय्सं नेपाःया सत्ताय् ओलीया पुनरागमनयात भारतय् मोदी सरकारया मेगु छगू असफलता धया हःगु दु ।
मोदी सरकारया गलत विदेश नीतिं यानाः जःलाखःला देय् श्रीलंका पूवंक हे चीनया मुलय् लाः वनेधुंकूगु दुसा आः चीनया मुलय् लाः वनीगु झ्वलय् नेपाः नं दुगु खँ उमिसं धयाहःगु दु ।
सरकारय् वया खतं हे प्रधानमन्त्री ओलीं न्हापा चीनयात ठेक्का बियातःगु बूढीगण्डकी हानं शुरु यायेगु धया हःगु व राजधानी काठमाडौं थ्यंक हइगु चीनया रेल–वे योजनायात हानं म्वाकेगु धया हःगु हे थुकिया संकेत जूगु खँ नं धाःगु दु ।
थौंकन्हय् नेपाःया परराष्ट्रविद्तय्सं नेपालं चीन व भारतया दथुइ सन्तुलन कायम यायेमाः धयाहःगु खँय् नं दिल्लीया बुद्धिजीवीतय्सं फरक कथं टिप्पणी याना हःगु दु – नेपाः व भारत दथुइ सलंसः किलोमिटर खुल्ला सीमा दु तर चीन धाःसा भौगोलिक रुपं नेपाः स्वयां तसकं तापाः । थज्याःगु अवस्थाय् नं नेपालं चीन व भारतया दथुइ ‘सन्तुलन’ कायम यायेमाः धाःगु धइगु अन्ततः चीनपाखे हे धेचूगु खः ।
भारतलिसे स्वापू स्यनेवं श्रीलंकाय् चीनं व्यापक लगानी यानाहः थें आः नेपलाय् नं चिनियाँ लगानी व्यापक रुपं दुहां वइगु अनुमान भारतं याना हःगु दु । भारतं धाःसा नेपालय् लगानी याये धाःगु आपालं परियोजनात थौं तकं थाति लाकातःगुलिं नेपालं भारतयात पत्याः यायेगु समेत त्वःता हःगु दु ।
LEAVE YOUR COMMENTS