ने. सं. ११४३ तछलाथ्व द्वादशी -

गठबन्धन तज्याइगु खतरा

येँ – एमसीसी पास यायेगु वा मयायेगु धइगु खँय् सत्ता गठबन्धन दुने अन्यौल जुयाच्वंगु इलय् लाक्क स्थानीय निकाया चुनाव यायेगु मिति घोषणां सत्ता गठबन्धन दुने तःधंगु अविश्वास समेत ब्वलंगु दु ।
गठबन्धन दुनेया सुत्रतय्सं धाः कथं स्थानीय निकायया चुनाव आकिवं वैशाख ३० गते यायेगु धकाः जूगु घोषणा बारे गठबन्धनया नेतात हे जानकार मजू । प्रधानमन्त्री शेरबहादुर देउवां गठबन्धनलिसे सहलह तकं मयासें चुनावया मिति घोषणा याःगु खँ धाःगु दु । प्रधानमन्त्रीया थ्व पलाखं यानाः आः वय्कः गठबन्धनयात वास्ता मयासे याकःचा हे न्ह्याः वनीगु खः लाकि धइगु ग्याःचिकु ब्वलंगु खँ सूत्रं धाःगु दु ।

खास यानाः एमसीसी पास यायेगु खँय् देउवा व माओवादी अध्यक्ष पुष्पकमल दाहाल दथुइ कचमच जुयाच्वंगु खःसा प्रम देउवां नेकपा (एस) या अध्यक्ष माधव नेपाललिसे तकं सहलह मयासे चुनावया मिति घोषणा यानादीगु खँ धाःगु दु । प्रम देउवां थःलिसे तकं सल्लाह मयासे चुनावया मिति घोषणा याःगु खँय् नेता नेपालं नुगलय् स्याकाच्वंगु खँ समेत सूत्रं धाःगु दु । नेता नेपालं देउवायात हे प्रधानमन्त्री दयेकेगु लागिं एमाले तछ्यानाः पिहां वयेगु तकया आँट यानादीगु खः ।

सत्ता गठबन्धन दुने औपचारिक निर्णय यायेगु लागिं रामचन्द्र पौडेलया संयोजकत्वय् छगू संयन्त्र गठन यानातःगु दुसा प्रम देउवां उगु संयन्त्रयात तकं जानकारी मबिसे चुनावया मिति घोषणा यानादीगु द्वपं नं लाःगु दु ।

सामान्यतया चुनावया मिति मन्त्रिपरिषद्या बैठक च्वनाः पारित यायेमाःगु चलन दु । तर प्रम देउवां थुकिया बारे मन्त्रिपरिषद् तक नं छलफल मयाःगु खँ नं सूत्रं धाःगु दु ।

सूत्रतय्सं धाः कथं प्रम देउवां स्थानीय चुनावया मिति याकःचां घोषणा याःगुया मू कारण एमसीसी सम्बन्धी विवाद खः । खास यानाः वय्कः लगायत माओवादी अध्यक्ष दाहाल समेत जानाः एमसीसीयात छ्वःगु पौ सार्वजनिक जुइवं प्रम देउवां थः नैतिक दबाबय् लाःगु महसुस यानादीगु खः । सरकारं एमसीसी पास यायेगु धकाः प्रतिवद्धता क्यनेधुंकाः नं दाहाल व नेपालं आलताल यानाच्वंगुलिं देउवां तःधंगु दबाब महसुस याःगु खँ धाःगु दु । वय्कलं थः यकःति कथं चुनावया मिति घोषणा यानाः माल धाःसा एमसीसी नं यकःति रुपं हे सदनय् हये मालेफु धकाः गठबन्धनया दलतय्त सन्देश बियादीगु खँ नं धयाहःगु दु ।

अमेरिकायात वामदेवया इनाप
नेकपा एकता राष्ट्रिय अभियानया संयोजक जुयाच्वंम्ह वामदेव गौतमं एमसीसी परियोजना लित कायेत अमेरिकी सरकारयात इनाप यानादीगु दु । म्हिगः छगू विज्ञप्ति पिकासें गौतमं एमसीसी परियोजना नेपालय् विवादित जूगुलिं संसदं पारित जुइ फइगु स्थिति म्हो जक दु, उकिं परियोजना लित कयादिसँ धकाः इनाप यानादीगु खः । वय्कलं विवादित परियोजनां नेपाःया अहित याइगु खँ नं धयादीगु दु । नेता गौतमं नेपाःया हितया नितिं नं एकपक्षीय रुपय् जूसां नं अमेरिकी सरकारं परियोजना लित कायेमाःगु खँ विज्ञप्तिइ धयादीगु दु । वय्कलं एमसीसी सम्झौता कार्यान्वयन यायेबलय् नेपाःया स्वतन्त्रता व सार्वभौकिताय् आँच वइगु शंका ब्वलनाच्वंगु खँ नं धयादीगु दु ।