समृद्ध अर्थतन्त्रय् सहकारीया महत्वपूर्ण योगदान

येँ – समृद्ध अर्थतन्त्र दयेकेत सहकारी ख्यलं नं महत्वपूर्ण योगदान बिउगु खँ सरोकारवालातय्सं धाःगु दु ।६१ क्वःगु सहकारी दिवसया लसताय् कृषि, भूमि व्यवस्था तथा सहकारी मन्त्रालयं ग्वसाः ग्वःगु अन्तक्र्रिया ज्याझ्वलय् न्ववानादीपिंसं थुगु खँ धयादीगु खः । ‘सहकारीपाखें आत्मनिर्भर राष्ट्रिय अर्थतन्त्रया निर्माण’ विषयय् जूगु अन्तक्र्रियाय् सहभागीपिंसं सहकारीपाखें यक्व हे सम्भावना ब्वलंकूसां उकिया सही उपयोग यायेमफुगुलिं देय् विकासं गति कायेमफुगु खँ धयादीगु खः । कृषि, भूमि व्यवस्था तथा सहकारी राज्य मन्त्री रामकुमारी चौधरीं नेपाःया अर्थतन्त्रया मुख्य आधार कृषि व सहकारीयात राज्यं प्राथमिकतातय् तयेमफुगुलिं देसं आर्थिक विकास यायेमफुगु खँ कनादिल । वय्कलं सहकारीपाखें किसानतय् जीवनस्तर सुधार हयेगु लिसें बेरोजगारयात रोजगारी बीत सरकार प्रतिबद्ध दुगु खँ नं न्ह्यथनादिल ।

‘नेपाःया अर्थतन्त्रया मुख्य आधार कृषि व सहकारीयात राज्यं प्राथमिकतातय् तयेमफुगुलिं देसं आर्थिक विकास यायेमफुगु खः’

अथेहे मन्त्रालयया सचिव गोपीनाथ मैनालीं ३०४ अर्ब बचत दुगु सहकारी ख्यःयात पिने तयाः देय्या विकास सम्भव जुइमखु धयादिसें सरकार व सहकारी थःथवय् जानाः न्ह्याः वनेमाःगु खँ धयादिल । वय्कलं स्थिर सरकार वयेधुंकाः देशय् लगानीया वातावरण दया वःगुलिं आर्थिक उपार्जनया ख्यलय् लगानी अप्वेकेमाःगु बिचाः तयादिल । मेमेपिं वक्तातय्सं श्रम, सीप व पुँजीयात एकीकृत यायेत सहकारीं महत्वपूर्ण भूमिका म्हितुगु दु धासें सहकारी संचालनय् सहज वातावरण दयेकेत सरकारयात इनाप याःगु खः । थौंकन्हय् नेपालय् ३४ हजार ५१२ गू सहकारी संचालनय् वयाच्वंगु दु ।

ज्याझ्वलय् मन्त्रालयपाखें निगू सहकारी व निम्ह सहकारीकर्मीपिंत सिरपाः नं लःल्हाःगु खः । थुगुसीया सहकारी सिरपाः महारानीझोडठा साना किसान कृषि सहकारी संस्था झापा व जनउत्थान बचत तथा ऋण सहकारी संस्था रुपन्देहीयात बिउगु खः । थ्व सिरपाः १ लाख ५० हजार नगद व सम्मानपत्रसहितया खः ।अथेहे सहकारी वर्ष पुरस्कार केन्द्रीय सहकारी प्रशिक्षण केन्द्रया पूर्व आचार्य सूर्यरत्न शाक्य व नेपाली केन्द्रीय बचत तथा ऋण सहकारी संस्था (नेफस्कुन)या पुलांम्ह अध्यक्ष कैलाशभक्त प्रधानाङयात बिउगु खः । थ्व सिरपाः छगू लाख तका व हनापौ सहितया खः ।

सम्बन्धित बुखँ

LEAVE YOUR COMMENTS