भिंद्यःत्वाःया चिभाः जिर्णोद्धार

येँ – येँ महानगरपालिका २० वडा भिंद्यःत्वालय् च्वंगु न्हना वनेत्यंगु छगः चिभाःया जिर्णोद्धार जूगु दु । चिभाः चैत्य संस्थापाखें चिभाःया ल्ह्वनेज्या याःगु खः ।

संस्थाया सचिव अमर सुन्दर तुलाधरया कथं भिंद्यः गुप्तवास तइगु फल्चा न्ह्यःने च्वंगु चिभाः न्हना वनेत्यंगु अवस्थाय् थ्यनाच्वंगुलिं स्थानीयपिनि इनाप कथं संस्थाया आर्थिक ग्वाहालि जिर्णोद्धार जूगु खः । ‘थन झ्वःलाक स्वंगः चिभाः दु, थुकी मध्ये निगः चिभाः खनेमदयेधुंकूगु दुसा खनेदुगु छगः चिभाः जिर्णोद्धार यानागु दु । थ्व चिभाः जिर्णोद्धार लिपा मेगु चिभाः नं पुनर्निर्माण जुइ धयागु आशा यानागु दु ।’

चिभाः चैत्य पाखें थुकथं हे न्हना वनेत्यंगु, स्यनाच्वंगु चिभाः–चैत्यया जिर्णोद्धार याना वयाच्वंगु दु । भाजु तुलाधरया कथं संस्थापाखें आःतकया दुने नीन्यागः चिभाःया जिर्णोद्धार यायेधुंकूगु दु । चिभाः ल्ह्वनेज्याया निंतिं स्थानीयलिसें देश विदेशं स्वतःस्फूर्तरुपं ग्वाहालि याना वयाच्वंगु खँ नं वय्कलं कनादीगु दु ।