नेवाः भासं पीएचडी याइम्ह तामाङ

येँ – यलया नेपालभाषा केन्द्रीय विभागय् नेपालभाषां पीएचडी यायेगु लागिं छम्ह तामाङ शोधार्थीं नं नां दर्ता याःगु दु ।तामाङ आन्दोलनया सक्रिय कार्यकर्ता भाजु अजितमान तामाङं नेपालभाषां पीएचडी यायेगु लागिं केन्द्रीय विभागय् थःगु नां दर्ता यानादीगु खँ विभाग सूत्रपाखें सीदुगु दु । भाजु तामाङं ‘दक्षिण एशियाया थीथी लिपि’ धइगु विषयय् शोध यायेगु कथं थःगु नां दर्ता यानादीगु खः ।

तामाङ जातिया अधिकारया लागिं ताः ई न्ह्यवंनिसें आन्दोलनरत भाजु तामाङ नेवाः भाय् ल्हायेगु जक मखु ब्वनेगु व च्वयेगुली तकं पोख्तम्ह अधिकारकर्मी खः । वय्कलं तामाङ जातिया इतिहास सम्बन्धी आपालं च्वसु व सफू नामं च्वयादीगु दु । वय्कः नेवाः जाति, नेवाः भाषा व साहित्य बारे बांलाक जानकारी दुम्ह अन्वेषक नं खः ।

थम्हं नेपालभाषां हे पीएचडी यायेगु धकाः नां दर्ता यानागुया निता कारण दुगु खँ ‘नेपालभाषा टाइम्स’ यात कनादिल । छता, कन्हय् तामाङ भासं नं डिपार्टमेन्ट चायेके माल धाःसा जनशक्ति तयार यायेगु । मेता, नेवाः पासापिंत मेगु जातियापिं मनूत थःगु भाषाय् पीएचडी यायेत वल धकाः उत्साहित यायेगु ।

थौंकन्हय् पीएचडी यायेगु लागिं न्हून्हूगु नियम वःगु जुयाः इन्ट्रान्स पास मजूतले थम्हं धाथें पीएचडी याये खनी वा मखनी धाये मफुगु खँ वयकलं कनादिल । वय्कलं धयादिल, ‘आःयात सुम्क हे च्वने, इन्ट्रान्स पास जुल धाःसा अले पूवंक खँ ल्हाये का, मजिउ ला ?’