भाषासेवी शिक्षासेवी जगमोहन वामि मंत

यल (नेपालभाषा टाइम्स)- नांजाःम्ह भाषासेवी लिसें वादेय्या शिक्षासेवी जगमोहन वामिं म्हिगः आकाझाकां मंत । वय्कः ८६ दँ दुम्ह खः ।
छेँजःपिंसं धाः कथं वय्कः छुंतां म्वायेक हे आकाझाकां मदुगु खः । म्हीग भ्वय् वनाः लिहां झाःम्ह वय्कः म्हिगः सुथय् थःगु हे क्वथाय् मदयाच्वंगु खः ।

म्हिगः पशुपतिया विद्युतीय शवदाह गृहय् वय्कःया अन्त्येष्टि जूगु दु । उगु इलय् वय्कःयात अन्तिम श्रद्धाञ्जलि प्वंकेत नांजाःम्ह कलाकार मदनकृष्ण श्रेष्ठलिसें आपालं भाषासेवीपिं नं उपस्थित जुयादीगु खः । भाजु वामिं च्वयादीगु आपालं ख्यालि म्ये मदनकृष्ण श्रेष्ठं हालादीगु दु । वय्कलं म्ये च्वयेगु जक मखुसें संगीत तयेगु व थम्हं हे हालेगु नं यानादीगु दु ।

वय्कलं वादेय्या ल्याय्म्हतय्त शिक्षाया अवसर बीगु लागिं स्कुल व कलेज चायेकेगु ज्या नं यानादीगु खः । मदुम्ह वामिया प्यम्ह म्ह्याय् लिसें निम्ह कायपिं दी । छुं ई न्ह्यः तिनि वय्कःया जहान मदुगु खः ।