‘राष्ट्र भाषा सःम्हेसित जक नागरिकता’

येँ (नेपालभाषा टाइम्स)- भाषा आयोगं अंगीकृत नागरिकता कायेत नेपाली भाषा वा नेपाःया छुं छगू राष्ट्रभाषाया न्युनतम ज्ञान माःगु सुझाव बिउगु दु । आयोगं म्हिगः राष्ट्रपति विद्यादेवी भण्डारीयात लःल्हाःगु खुक्वःगु वार्षिक प्रतिवेदनय् उगु सुझाव न्ह्यथनातःगु खः ।

आयोगं बिउगु सुझावय् धयातःगु दु, ‘स्थानीय तहं क्वःछिउगु सरकारी ज्याखँया गुगुं छगू भाषाया न्यूनतम सक्षमता सुनिश्चित यानाः अंगीकृत नागरिकता बीगु व्यवस्था यायेमाःगु जरुरी खनेदु, नेपालय् न्हिथंया जीवनयापनया नितिं मूलभूत आवश्यकता पूवंके फइम्ह लिसे समाजय् सञ्चार सम्पर्क कायम तयेफइगु न्यूनतम भाषिक सक्षमता दुगु सुनिश्चित यायेत अंगीकृत नागरिकता काये चाहे जूम्ह व्यक्तिं पायक जूगु स्थानीय तहया शिक्षा शाखां नेपालय् ल्हाइगु गुगुं छगू भाषाया न्यूनतम सक्षमता प्रमाणीकरण याये दइ कथं संघीय कानुनय् व्यवस्था यायेमाःगु खनेदु ।’

आयोगं पालिका व प्रदेश लिसें संघीय भाषा नीति व संघीय भाषा ऐन नं दयेकेमाःगु सुझाव बिउगु दु । उकथं हे संघ, प्रदेश व स्थानीय तहलय् बहुभाषिक नीति दयेकेमाःगु, स्वंगुलिं तहलय् बहुभाषिक नीति नालेमाःगु, भाषिक हिंसा चीकेगु कथं भाषिक मानव अधिकारया प्रत्याभूति जुइ कथं ऐन दयेकेमाःगु खँ न्ह्यथनातःगु दु । मातृभाषां शिक्षा कायेदइगु हकया प्रत्याभूति बीमाःगु, भाषिक सहिदया अभिलेख संकलन यानाः भाषिक सहिद घोषणा यायेमाःगु खँ नं प्रतिवेदनय् न्ह्यथनातःगु दु ।

उकथं हे भाषा अनुसन्धान केन्द्रया थापना यायेमाःगु, शिक्षाया माध्यम भाषाया जग दयेकेमाःगु, सरकारी कामकाजया भाषाया आधार दयेकेमाःगु खँ नं प्रतिवेदनय् न्ह्यथनातःगु दु । नेपाली सांकेतिक भाषा व ब्रेललिपिया माध्यमं शिक्षा व सुचं कायेदइगु व्यवस्था जुइमाःगु, पठन पाठनया न्ह्यसःपौ व प्रमाण पत्रया भाषा नेपाली जुइमाःगु, सार्वजनिक पद धारण याइम्ह व्यक्तिं नेपाली भाषा व मातृभाषा शपथ काये दइगु व निगुलिं भाषाया अभिलेख तयेगु व्यवस्था मिले यायेमाःगु लगायत २७ बुँदे सिफारिस नं याःगु दु ।

नेपालय् भारोपेली, भोट बर्मेली, आग्नेली/अस्ट्रो एसियाली, ड्रबिड व परिवार खुले मजूगु कुसुन्डा भाषा यानाः न्यागू भाषा परिवारया भाषा ल्हायेगु यानाच्वंगु खँ नं प्रतिवेदनय् न्ह्यथनातःगु दु ।

लिपांगु अध्ययन कथं नेपालय् १ सय ३२ गू भाषा दुगु खँ नं प्रतिवेदनय् न्ह्यथानतःगु दु । थ्व स्वयां न्ह्यः २०६८ सालया जनगणनाया तथ्यांक कथं नेपालय् १ सय २३ भाषा दुगु खँ धयातःगु खः ।

सम्बन्धित बुखँ

LEAVE YOUR COMMENTS