संस्थान भंग यानाः गुथितय्त जग्गा लित बिउ

येँ – सरकारं हःगु गुथि विधेयक विरुद्ध न्ह्यानाच्वंगु आन्दोलनया झ्वलय् थनिं झिदँ न्ह्यः कुमारी जात्राय् जूगु छगू थज्याःगु हे मेगु आन्दोलनं गठन याःगु उच्चस्तरीय अध्ययन समितिया प्रतिवेदन नं चर्चाया विषय जूगु दु । वि.सं. २०६५ सालया भदौ महिनाय् कुमारी जात्राय् पिहां वइगु पुलुकिसि, लाखे व सवःद्यःयात बीमाःगु बलिया बजेट रोक्का याना बीवं उगु आन्दोलन जूगु खः । आन्दोलन लिपा तत्कालीन नेवाः देय् दबूया मूछ्यांज्ये पवित्र वज्राचार्यया अध्यक्षताय् सरकारं हे छगू उच्चस्तरीय अध्ययन समिति गठन याःगु खः । उगु समितिं करिब झिला तक अध्ययन यासें छगू प्रतिवेदन तयार यानाः सरकारयात लःल्हाःगु खः ।

गुथि संस्थानया औचित्य दु लाकि मदु न्ह्यसः तयाः संघीय मामिला, संसदीय व्यवस्था तथा संस्कृति मन्त्रालयं उगु समिति गठन याःगु खः । समितिं बिउगु प्रतिवेदनय् गुथि संस्थानया औचित्य मदुगु खँ न्ह्यथना तःगु दु । गुथि संस्थानं नेवाःतय्गु गुथि व गुथिं तयातःगु जग्गाया बांलाक व्यवस्थापन याये मफुगु कारणं गुथि संस्थान हे भंग यानाः नेवाःतय्गु गुथि सञ्चालनया लागिं अलग्ग हे निकाय गठन यायेमाः धइगु प्रस्ताव नं उकी याना तःगु खः ।

प्रतिवेदनय् गुथि संस्थान भंग यानाः संस्थानयाके दुगु जग्गा व थ्व सम्बन्धी अधिकार सम्बन्धित गुथितय्त हे बीमाःगु सुझाव प्रस्ताव याना तःगु दु । नेवाःतय्गु गुथि सञ्चालन याइगु फुक्कं गुुथितय्त दुजः दयेकाः ‘नेवाः संस्कृति सम्पदा संरक्षण कोष’ नामं छगू बिस्कं निकाय गठन यायेगु खँ उकी न्ह्यथना तःगु दु । उकी जात्रा चले याइपिं प्याखं चले याइपिं, सम्पदा संरक्षण याइपिं, बाजं सञ्चालन याइपिं पुचःतय्गु अलग अलग समिति दयेकेगु व उकियापाखें हे कार्यसमिति दयेकाः ज्याइ ।

आः जुयाच्वंगु आन्दोलनया झ्वलय् यदि सरकारलिसे वार्ता याये माल धाःसा उगु प्रतिवेदनयात नं न्ह्यःने तयेमाःगु खँ उकिया संयोजक जुयादीम्ह पवित्र वज्राचार्यं कनादीगु दु । अथे हे उगु समितिं गठन याःगु अध्ययन कार्यदलया कजि डा. चुन्दा वज्राचार्यं गुथि विधेयक विरुद्ध आः जुयाच्वंंगु आन्दोलनया इलय् थ्व प्रतिवेदन लागू याकेगु ज्या जुइमाः धयादीगु दु ।