न्यान्हुयंकं ‘झंगःपंक्षी पर्यटन सीप तालिम’

येँ – नेपाःस्थित अस्ट्रेलियन दूतावासया ग्वाहालिं न्यान्हुयंकं जूगु ‘झंगःपंक्षी पर्यटन सीप तालिम’ (पंक्षी सम्बन्धी गाइड) क्वचाःगु दु ।
बर्ड कन्जर्भेसन नेपालया ग्वसालय् जूगु तालिमय् सहभागी मिस्तय्त शुक्रवाः अस्ट्रेलिन राजदूत फेलिसिटी भोल्कं प्रमाणपत्र लःल्हानादीगु दु ।

तालिम समापन ज्याझ्वलय् न्ववानादिसें राजदूत भोल्कं धयादीगु दु, ‘कोभिड मदयेधुंकाः अन्तर्राष्ट्रिय यात्रा सुरु जुइ, अले नेपालय् नं पर्यटक दुहां वइगु जुइ । नेपाः हाकनं पर्यटकतय्त निंतिं प्राथमिकता लाइ, उबलय् छिकपिंसं नेपाःया रैथाने व आगन्तुक झंगःपंक्षीतय्त पर्यटकतय् निंतिं आकर्षक रूपं न्ह्यब्वयेत थ्व तालिमं महत्वपूर्ण भूमिका म्हिती धयागु विश्वास यानागु दु ।’

वय्कलं मिस्तय्त बिउगु थ्व तालिमं सहरी क्षेत्र दुनेया वन्यजन्तुया प्राकृतिक बासस्थान व जंगलय् दुगु जैविक विविधता संरक्षण मिसा मिजं सकसिगुं सहभागितां अझ महत्व अप्वयेकी धकाः नं धयादीगु दु । तालिमया झ्वलय् प्रशिक्षार्थीतय्त शिवपुरी नागार्जुन राष्ट्रिय निकुञ्ज, टौदह, व रानीबारी सामुदायिक बनया भ्रमण याकुसें अन दुपिं झंगःपंक्षी, उमिगु बासस्थान व संरक्षणया थीथी पक्ष बारे जानकारी बिउगु खः ।