पेट्रोलया भाः थकाःगुलिं नेवि संघया धर्ना

येँ (नेपालभाषा टाइम्स) – पेट्रोलियम पदार्थया भाः थकाःगु विरोधय् नेपाल विद्यार्थी संघं नेपाल आयल निगमया ज्याकू बबरमहलय् धर्ना बिउगु दु। विद्यार्थीतय्सं ‘नाफा घाटा मसिउ, भाः थकाःगु माने यायेमखु, जनता स्याये दइमखु, भ्रष्टाचारी सरकार राजीनामा बिउ’ धकाः नारा थ्वयेकुसें धर्ना बिउगु खः । विद्यार्थीतय्सं आम उपभोक्ताया आम्दानी म्हो जूगु व ज्या मदयेकाः च्वनेमाःगु इलय् पटक-पटक पेट्रोलियम पदार्थया भाः थकायेगु
अमानवीय ज्या जूगुलिं थःपिं धर्ना बीत बाध्य जुयागु खँ नेविसंघया महामन्त्री दीपक भट्टराईं कनादिल ।

थ्वहे झ्वलय् आयल निगमं थुगु चालु दँय् जक पेट्रोलियम पदार्थपाखे खुद नाफा जक ६ अर्ब जूगु खँ धाःगु दु। निगमं थुगु दँय् जक सरकारयात थीथी कर शीर्षकय् ६६ अर्ब तका पुलेधुंकूगु दु ।