
येँ (नेपालभाषा टाइम्स)- सरकारं सांसदतय् कार्यावधियात कयाः हयेत्यंगु विधेयकयात कयाः निर्वाचन आयोगं नं आपत्ति प्वंकूगु दु । निर्वाचन आयोगं सोमवाः छगू विज्ञप्ति पिथँसें सांसदतय् कार्यकाल निर्वाचन लिपा तक नं दइगु कथं हःगु विधेयकय् आयोगं गम्भीर ध्यानाकर्षण जूगु खँ धयातःगु दु ।
सरकारं न्हू निर्वाचित सांसदतय्गु न्हापांगु संसदीय बैठक मच्वंतले पुलांगु संसद हे कायम जुयाच्वनीगु व्यवस्था यानाः विधेयक हःगु खः । थ्व विधेयक हयेगु प्यखेरं विरोध तच्वयावःगु खःसा आः निर्वाचन आयोगं नं छगू वक्तव्य हे पिकासें थुकिया विरोध याःगु खः ।
आयोगया वक्तव्यय् २०७४ सालया निर्वाचनलिपा कायम जूगु प्रतिनिधि सभा व प्रदेश सभाया कार्यकाल सम्बन्धय् व्यवस्था यानातःगु विधेयकय् आयोगया गम्भीर ध्यानाकर्षण जूगु धयातःगु खः । वक्तव्यय् धयातःगु दु, ‘निर्वाचनया निंतिं उम्मेदवारीतय् मनोनयन दर्ता जुइधुंकाः सभामुख व उपसभामुखया पद मदइगु संवैधानिक व्यवस्था दुगु अवस्थाय् प्रतिनिधि सभा व प्रदेश सभाया मेपिं दुजःत धाःसा निर्वाचनया निंतिं मनोनयन दर्ता यायेधुंकाः नं व हे पदय् कायम जुयाच्वनीगु कथं कानुन संवोधन याये उपयुक्त मजू ।’
सरकारं सांसदतय् कार्यविधि ताःहाकः यायेत संविधानय् सांसदतय् कार्यकाल गुबले निसें सुरु जुइ व गुबलय् अन्त जुइ धयागु उल्लेख यानामतःगु धासें न्हू निर्वाचित जनप्रतिनिधितय् न्हापांगु संसदीय बैठक मच्वंतले पुलांगु हे संसद कायम जुयाच्वनीगु कथं विधेयक हःगु खः । थ्व विधेयक वयेवं राष्ट्रिय प्रजातन्त्र पार्टीया अध्यक्ष राजेन्द्र लिङ्गदेनं आइतवाः संसदय् हे थज्याःगु अनैतिक ज्याय् थः संलग्न जुइफइमखु धकाः सांसद पदत्याग यायेगु घोषणा याःगु खः ।
सरकारं हःगु थ्व विधेयकयात कयाः प्यखेरं विरोध तच्वया वयेवं सरकारं थ्व विधेयक हे संशोधन यायेत्यंगु दु । आः सरकारं निर्वाचनया निंतिं उम्मेदवार दर्ता सुरु जुइवं संसदया कार्यकाल क्वचाइगु कथं विधेयक संशोधन यायेत्यंगु खः । न्हापा हःगु विधेयकयात कयाः तःधंगु आलोचना जुइगु सत्तागठबन्धन दथुइ विधेयक संशोधन यायेगु सहमति जुइधुंकूगु दु ।
आः संशोधित विधेयकय् उम्मेदवारी दर्ता यायेगु न्हि कुन्हु हे संसदया कार्यकाल क्वचाइगु व सांसदतय्सं सपथ ग्रहण याःकुन्हु निसें कार्यकालया गणना यायेगु कथं विधेयक संशोधन यायेत्यंगु खः । सरकारं ‘केही ऐन संशोधन’ पाखें विधेयक संशोधन यायेगु प्रस्ताव हःगु खः ।
LEAVE YOUR COMMENTS