भ्यू टावरया ज्या अनिश्चित

येँ – थनया पुलांगु बस पार्कय् दयेकाच्वंगु भ्यू टावरया निर्माण आः छु जुइगु खः धाये मफइगु अवस्थाय् लानाच्वंगु दु । थौंकन्हय् थुकिया ज्या पूवंक दिनाच्वंगु दु । येँ महानगरपालिकाया प्रवक्ता ईश्वर–मान डंगोलं ‘नेपालभाषा टाइम्स’ लिसे खँ ल्हासें थौंकन्हय् भ्यू टावर दयेकेगु ज्या दिनाच्वंगु खँ कनादीगु खः ।

वय्कलं न्यादँया दुने भ्यू टावर दयेकेगु ज्या क्वचायेकेमाःगु खःसां नं दयेकेगु ज्या दिनाच्वंगुलिं भ्यू टावरया ज्या अनिश्चित जूगु खँ कनादिल । वय्कलं सम्झौता कथं गुलि ज्या जुइमाःगु खः उलि ज्या मजुयाच्वंगु धासें उकियात छु यायेगु धइगु बारे सहलह जुयाच्वंसां नं निर्णय धाःसा जुइ मफयाच्वंगु खँ नं कनादिल ।

भ्यू टावर दयेकेगु ज्याय् संलग्न ठेकेदार कम्पनीया अध्यक्षयात एपेक्स डेभलपमेन्ट बैंक घोटाला काण्डय् ज्वनेवं भ्यू टावर दयेकेगु ज्या नं अनिश्चित जूवंगु खः । भ्यू टावर दयेकेगु ज्या वंगु भदौ दुने छुं प्रतिशत क्वचायेकेमाःगु सर्त दुगु खःसां नं सर्त कथं ज्या धाःसा जुयाच्वंगु मदु ।

बसपार्क दुगु खुल्ला थासय् तजाःगु छेँ दने त्यन धकाः छुं ई न्ह्यः स्थानीय मनूतय्सं निर्माणस्थलय् हे वनाः उकिया विरोध याःगु खःसां आः धाःसा अज्याःगु विरोध यायेगु ज्या नं जुयाच्वंगु मदु । येँ मनपा दुने नं आः भ्यू टावर मदयेकेगु हे पाय्छि जुइ धइगु मत अप्वयाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS