प्रधानन्यायाधीश पराजुलीयात महाभियोग तइगु !

येँ – प्रधानन्यायाधीश गोपाल पराजुली कन्हय् नं प्रधानन्यायाधीशया हे हैसियत ज्या न्ह्याकल धाःसा महाभियोग तयेफुगु खँ धाःगु दु । न्यायपरिषदया सचिवालय पाखें प्रधानन्यायाधीश गोपाल पराजुलीयात पदमुक्त जूगु जानकारी सहित पौ बीधुंकूगु दु । तर प्रधानन्यायाधीश पराजुली धाःसां थ्व पौ अवैधानिक धासें थःम्ह उकियात स्वीकार यायेमखु धायेधुंकूगु दु ।

न्यायापरिषद् सचिवालयं उमेर हदबन्दीया कारणं पदमुक्त जुइधुंकूगु पौ बिइधुंकाः नं पराजुलीं प्रधानन्यायाधीशया हे हैसियतय् बुधवाः न्यायापरिषद्या बैठक तःगु खः । पराजुलीया थ्व ज्यां सत्तापक्ष तम्वःगु खँ धाःगु दु ।

पराजुली बैठक तयेधुंकाः प्रधानमन्त्री केपी ओलीयाथाय् माओवादी केन्द्रया अध्यक्ष प्रचण्डलिसें सत्तारुढ वामगठबन्धनया नेतातय् दथुइ वार्ता जूगु खः । थ्व वार्ताय् पराजुलीं आः नं प्रधानन्यायधीशया हैसियतं ज्या यात धाःसा महाभियोगय् वनेगु बारे सहलह जूगु खँ धाःगु दु ।

सर्वोच्चया न्यायाधीश चोलेन्द्र शम्शेर जबरां प्रधानन्यायाधीश उमेरया कारणं पदय् च्वने मिले मजू धकाः इजलास बहिष्कार यायेवं प्रधानमन्त्री ओलीं प्रधानन्यायाधीशयात सःताः निकासा बीत इनाप यानादीगु खः । उबलय् हे वय्कलं प्रधानन्यायाधीशयात बिदाय् च्वनेत इनाप नं यानादीगु खः । तर प्रधानन्यायाधीश थ्व खँ माने मजूसे सर्वोच्च वनाः ज्या यानादीवं प्रधानमन्त्री नं तम्वयाच्वंगु खः ।

प्रधानमन्त्री ओलीं म्हिगः सुथय् सांसदतय्त बालुवाटारय् बिउगु चियापान ज्याझ्वलय् न्ववासें हे थःगु तं अभिव्यक्ति यानादीधुंकूगु दु । वय्कलं प्रधानन्यायाधीश बारे प्रधानमन्त्री न्ववायेमजिउ धाइसां थःम्हं नमवासें मजिइधुंकूगु खँ धयादीगु खः ।

मेखे नेपाली कांग्रेसं धाःसा प्रधानन्यायायाधीशयात महाभियोग मतयेत सत्तापक्षयात ख्याच्वः बिउगु दु । कांग्रेसया वरिष्ठ नेता रामचन्द्र पौडेलं प्रधानन्यायाधीशविरुद्ध महाभियोग तल धाःसा थःपिं सुम्क मच्वनेगु खँ धयादीगु दु ।