नारायणहितिइ रेष्टुरेन्ट !

येँ – संस्कृति, पर्यटन तथा नागरिक उड्डयन मन्त्री प्रेमबहादुर आलें नारायणहिति दरवार संग्रहालय दुने रेस्टुरेन्ट दयेकेगु ज्या तत्काल दिकेत व थ्वलिसे सम्बन्धित भ्वं मन्त्रालयय् हयेत उजं बियादीगु दु ।

मन्त्री आलेया मौखिक निर्देशन लिपा नारायणहिति दरवार संग्रहालय व गणतन्त्र स्मारक व्यवस्था तथा सञ्चालक विकास समितिं बी म्यानेजमेन्ट प्रालियात रेष्टुरेन्ट दयेकेगु ज्या दिकेत पौ च्वःगु दु । विकास समितिं सञ्चार माध्यमय् वःगु समाचारया कारणं विवाद ब्वलंगुलिं मन्त्रालयया निर्देशन कथं निर्माण ज्या दिकागु खँ धाःगु दु ।

पतिइ धयातःगु दु, ‘थुगु नारा– यणहिति दरवार संग्रहालय व गणतन्त्र स्मारक व्यवस्थापन तथा सञ्चालन विकास समिति व उगु प्रालि दथुइ सम्झौता जुयाः रेष्टुरेन्ट दयेकेगु ज्या न्ह्यानाच्वंगु बारे सञ्चार माध्यमय् वःगु समाचारं विवाद ब्वलंगुलिं संस्कृति, पर्यटन तथा नागरिक उड्डयन मन्त्रालयया मौखिक आदेश कथं मेगु आदेश मजूतले दयेकेगु ज्या तत्काल दिकेत जानकारी याकाच्वना ।’

मन्त्री आलें नारायणहिति दरवार संग्रहालय दुने रेष्टुरेन्ट दयेकेत जूगु सम्झौता, टेन्डर लगायतया निर्णय जूगु भ्वं झिके याःगु खः ।
मन्त्रीं भ्वं माग यायेवं नारायणहिति दरवार संग्रहालय व गणतन्त्र स्मारक व्यवस्थापन तथा सञ्चालन विकास समितिं भ्वं फुक्कं मन्त्रालयय् बुझे याःगु दु । समितिं नारायणहिति दरवार संग्रहालयया १० रोपनी जग्गा बालं बिउगु खः । अन बतास कम्पनी रेष्टुरेन्टपाखें होटल चायेकेगु सम्झौता याःगु खःसा बतासं उगु क्षेत्रफल स्वयां अप्वः जग्गा कःघानाः स्थायी संरचना दयेकेवं अन विवाद ब्वलंगु खः । समितिं प्रति रोपनी लय् न्यय्द्वः तकां बालं कायेगु सम्झौता याःगु खःसा व्यवसायीतय्सं थुकियात ‘कौडीया भावं समितिं सम्झौता यात’ धकाः द्वपं बिउगु दु ।

उकथं हे नारायणहिति दरवार दुने संरचना दयेकेगु नितिं येँ महानगरपालिकाया स्वीकृति नं मकाःगु खँ सीदुगु दु । येँ महानगरपालिका दुने छुं नं कथंया संरचना दयेके न्ह्यः अनिवार्य स्वीकृति कायेमाःगु व्यवस्था दु । अन स्थायी संरचना दयेकेगु लागिं महानगरपालिकाय् वनाः नक्सा पास तकं मयाःगु खँ नं धाःगु दु ।

सम्बन्धित बुखँ

LEAVE YOUR COMMENTS