भूमि मन्त्रीयात हाकुगु ध्वाँय्

सक्व – भूमि व्यवस्था, सहकारी तथा गरिबी निवारण मन्त्री पद्मा अर्यालयात सक्वय् म्हिगः हाकुगु ध्वाँय् क्यंगु दु । गुथि विधेयक हःगु कारणं विवादय् लाःम्ह मन्त्री अर्यालयात नेकां समर्थित नेपाल विद्यार्थी संघया कार्यकर्तातय्सं हाकुगु ध्वाँय् क्यंगु खः ।

कला संस्कृति सम्पदा संरक्षण समिति शंखरापुरया ग्वसालय् म्हिगः न्हिनय् सक्वया सुविधायुक्त मालपोत कार्यालय घोषणा ज्याझ्वलय् ब्वति काः वःम्ह मन्त्री अर्यालयात हाकुगु ध्वाँय् क्यंगु खः । उगु इलय् कार्यकर्तातय्सं वय्कःयात ‘नालायक मन्त्री, राजीनामा दे’ धकाः नाराबाजी नं याःगु खः ।

मन्त्रीयात हाकुगु ध्वाँय् क्यनीगु संकेत वयेवं प्रशासनं कडाइ याःगु खःसा मालपोत कार्यालयया ज्याझ्वलय् वनीपिंत नं सुरक्षाकर्मीं खानतलासी काःगु खः । मन्त्री अर्यालयात ज्याझ्वः सिधयेकाः लिहां वयाच्वंगु इलय् हाकुगु ध्वाँय् क्यंगु खः ।