जलय् स्वपु म्येँया म्युजिक भिडियो पितब्वज्या
यल(नेपालभाषा टाइम्स)÷थनया सांस्कृतिक व धार्मिक नगरी जल, हरिसिद्धिइ जूगु छगू ज्याझ्वलय् छक्वलं स्वपु नेपालभाषाया म्येँया म्युजिक भिडियोया पितब्वज्या याःगु दु । वंगु शनिवाः जूगु ज्याझ्वलय् उगु म्युजिक भिडियोया पितब्वज्या याःगु खः ।
मूपाहांकथं झायादीम्ह ख्यालि जुजु मदनकृष्ण श्रेष्ठं ‘बुंगद्यःया जात्राबलय्’, ‘जि छंगु गल्लीइ वया’ व ‘सुथय् न्हापां लः काः वःम्ह’ म्येँया म्युजिक भिडियो पितब्वज्या यानादीगु खः । म्युजिक भिडियोया पितब्वज्या यासें ख्यालि जुजु श्रेष्ठं थौंया इलय् म्येँ हालाः रिकर्ड यायेगु जक यायेगु मखसे आः उकियात सकसिनं स्वये नं खनिकथं म्युजिक भिडियो निर्माण याना वनेमाः धयादिल ।
वरिष्ठ सिने पत्रकार विजयरत्न असंबरें पितब्वज्या जूगु म्युजिक भिडियोया समीक्षा यानादीगु ज्याझ्वलय् नेवाः पत्रकार राष्ट्रिय दबूया निवर्तमान नायःलिसें नांजाःम्ह म्येँ हालामि सुरजवीर वज्राचार्यं नं नुगःखँ तयादीगु खः । ज्याझ्वलय् नांजाःम्ह बरिष्ठ संगीतकःमिलिसें रेडियो नेपालया संगीत शाखाया प्रमुख मनराजा नकःमि, म्येँ हालामि आशा नकःमि, संगीतकःमि निरञ्जन महर्जन पाहांकथं झायादीगु खः ।
पितब्वज्या म्युजिक भिडियोय् सुरज नापित, आराध्यलक्ष्मी खड्गी, शोभा महर्जन, किरण जोशी, अनुज शाक्य, सुविन कायस्थं अभिनय यानादीगु दुसा निपु म्युजिक भिडियोया निर्देशन बीके जल्मी व छपु राज महर्जनं यानादीगु खः । अथे हे छपु म्युजिक भिडियोया छाँयाकनं बीके जल्मी, निपु रविन डंगोलं यानादीगु खःसा सम्पादन बीके जल्मीं यानादीगु खः । ज्याझ्वलय् नांजाःम्ह म्युजिक एरेन्जर जीवित जल्मीं लसकुस यानादीगु खः ।
LEAVE YOUR COMMENTS