माधव व महन्थया पार्टीया न्हूगु नां

येँ – नेकपा एमाले तज्याःगु माधव नेपाल पुचः व जनता समाजवादी पार्टीं तज्याःगु महन्थ ठाकुर पुचलं थःपिनिगु पार्टीया नां हिउगु दु । एमाले तज्याःगु माधव नेपाल पुचलं थःगु पार्टीया नां नेकपा (एकीकृत समाजवादी) तयेगु प्रस्ताव याःगु दु ।

नेपाल पुचलं थ्व स्वयां न्ह्यः (एमाले समाजवादी) नां प्रस्ताव यानाः दल दर्ताया नितिं निवेदन बिउगु खः । तर मेगु दल लिसे ज्वःलाःगु नां तये मजिउगु निर्वाचन आयोगया प्रावधानया कारणं यानाः पार्टीया नां नेकपा (एकीकृत समाजवादी) प्रस्ताव यासें निर्वाचन आयोगय् वंगु खः ।

उकथं हे महन्थ ठाकुरं नं पार्टीया नां हिउगु दु । पार्टीया न्हूगु नां लोकतान्त्रिक समाजवादी पार्टी तयाः निर्वाचन आयोगय् प्रस्ताव याःगु खः । सरकारं संसदीय दल वा केन्द्रीय समितिया २० प्रतिशत खाकल धाःसा पार्टी तछ्याये फइगु अध्यादेश हयेवं ठाकुर पक्षं जनता समाजवादी पार्टी व नेपाल पक्षं एमाले समाजवादी पार्टी तयाः निर्वाचन आयोगय् निवेदन बिउगु खः । तर निर्वाचन आयोगया अधिकारीपिं सर्वाेच्च अदालतया फागुन २३ गतेया फैसला कथं छगू पार्टीया नामय् विशेषण घाकाः मेगु दल दर्ता याये मदइगु खँ धायेवं निगुलिं पार्टीं थःपिनिगु पार्टीया नां हिउगु खः ।

निर्वाचन आयागया प्रवक्ता राजकुमार श्रेष्ठया कथं पार्टीया न्हूगु नामय् निवेदन वयेधुंकूगु व पार्टी दर्ता प्रक्रिया पूवनेवं आयोगं निर्णय याइगु जानकारी बियादीगु दु । फागुन २३ गते सर्वोच्च अदालतं तत्कालीन नेकपाया नां सम्बन्धी विवादय् ज्वःलाःगु नां तयेमजिउगु फैसला न्यंकूगु खः ।

थ्वहे झ्वलय् निर्वाचन आयोगं नेपाल नेतृत्वया दल ठाकुर नेतृत्वया दल दर्ताया यायेत सनाखतया निंतिं भदौ ९ गते सांसद व प्रस्तावित केन्द्रीय दुजःपिंत आयोगय् सःतूगु दु । म्हिगः च्वंगु निर्वाचन आयोगया बैठकं निगुलिं दलयात सनाखतया निंतिं सःतेगु निर्णय याःगुु खः ।

प्रस्तावित दलया नेता व सांसदयात हस्ताक्षर यायेत भदौ ९ गते ११ बजे निसें २ बजे तकया ई बियाः सःतूगु खः ।