नंसालय् भक्तजनतय् भीड

येँ (रासस)- नवरात्री सुरु जुसां निसें स्वनिगः दुनेया थीथी शक्तिपीठय् भक्तजनतय् भीड जुयावःगु दु । स्वनिगःया नंसा भगवती, शोभा भगवती, भद्रकाली, मय्ति, कालिकास्थान, संकटा, न्यत अजिमा लगायतया देगः नं बांलाकातःगु दु । राष्ट्रप्रमुख पाखें शक्तिपीठया दर्शनया झ्वलय् दकलय् न्हापां वनीगु नंसा भगवती देगः रंगीचंगी मत तयाः छाय्पियातःगु दु ।सुथय् दर्शनार्थीतय् भीड जुइगु देगलय् सनिलय् मत च्याके धुंकाः झन हे अप्व मनूत वइगु खः नक्साल भगवती सामुदायिक सदनया अध्यक्ष सुरेशमान श्रेष्ठं कनादिल ।

वय्कलं धयादिल, ‘प्रमुख शक्तिपीठ मध्येय् छगू शक्तिपीठयात स्थानीयतय्सं बांलाक संरक्षण यानातयागु दु । अझ मोहनिबलय् अप्वः भक्तजनत वइगु जूगुलिं देगः छाय्पिया आकर्षक दयेकेत रंगीचंगी मततयागु दु । गुकिं यानाः सुथय् द्यः दर्शन याःवःपिं भक्तजनतय् सनिलय् फोटो कायेत वयाच्वंगु दु ।’ झिंखुका ल्हाः दुम्ह देवीया मूर्ति दुगु नंसा भगवतीयात दुर्गाया रुपय् हे पुज्याना वयाच्वंगु व नंसा भगवतीप्रति स्वनिगःवासीपिनि तःधंगु आस्था दुगु देगःया द्यःपाःलाः निलिक महर्जनं धयादिल । वय्कलं धयादिल, ‘दुर्गाया रुपय् पुज्याइम्ह नंसा भगवतीप्रति भक्तजनतय् तःधंगु आस्था दु ।’

थ्व देगःया स्थापना लिच्छविकालय् जूगु किंवदन्ति दु । स्वनिगःया नंसा भगवती, शोभा भगवती, व नाला भगवतीइ छगू कथंया मूर्ति दु । थ्व स्वम्ह भगवतियात तःकेहेँ धायेगु याः ।