सप्तपाताल पुखूया शिलान्यास

यल- थनया लगंख्यलय् च्वंगु सप्तपाताल पुखू पुनःनिर्माण याइगु जूगु दु । पुखू पुनःनिर्माणया निंतिं वंगु सोमवाः शिलान्यास याःगु दु ।
लगख्यःस्थित नेपाली सेनाया राजदल गण परिसरय् च्वंगु पुखू पुनःनिर्माणया निंतिं यल महानगरपालिकाया प्रमुख चिरिबाबु महर्जन व नेपाल सेनाया प्रधानसेनापति प्रभुराम शर्मां मंकाःकथं शिलान्यास यानादीगु खः ।

झण्डै निगू दशकं मल्याक सामाजिक, कानूनी व थीथीकथंया संघर्ष लिपा यलया हे चर्चित उगु पुनःनिर्माण जुइत्यंगु खः । सप्तपाताल पुखूलिसें परिसरय् च्वंगु मेगु पुखू नं पुनःनिर्माण याइगु जूगु दु ।

यल महानगरपालिकाया नेतृत्व व ग्वाहालिइ सप्तपाताललिसें राजदल गण दुने हे पुखूलिसे स्वाःगु मेगु पुखू नं पुनःनिर्माण यायेत्यंगु खः । गण परिसरया पुखू पुनःनिर्माण यायेत वंगु जेठया अन्त्यपाखे यल महानगरपालिका व नेपाली सेना दथुइ छगू सम्झौता नं जूगु खः । सम्झौता पती यल महानगर प्रमुख चिरिबाबु महर्जन व राजदल गणया गणपति सुमित विक्रम राणां ल्हाःचिं तयादीगु खः ।

लगनखेल वातावरण सुधार संस्थाया अध्यक्ष पूर्ण विश्वकर्माया सभापतित्वय् जूगु शिलान्यास ज्याझ्वलय् जिल्ला प्रशासन ज्याकू यलया प्रमुख घनश्याम उपाध्याय, यल महानगरया प्रमुख प्रशासकीय अधिकृत गणेश अर्याल, यल महानगरपालिका, यल प्रहरी प्रमुख, जनप्रतिनिधिपिनिगु उपस्थिति दुगु खः ।