वाइएमबीएया ५० दँ क्यंगु लसताय् लुमन्ति पौ
यल- युवक बौद्ध मण्डल, नेपाल (वाइएमबीए) न्ययदँ क्यंगु लसताय् वंगु शनिवाः छगू ज्याझ्वः जुल । संस्थाया स्वर्ण जयन्तीया लसताय् जूगु ज्याझ्वलय् ‘स्वर्ण दर्पण’ नांया लुमन्ति पौ सार्वजनिक याःगु खः ।
वाइएमबीएया नायः अरणीतारा वज्राचार्यया सभापतित्वय् जूगु ज्याझ्वलय् मूपाहांकथं बिज्याःम्ह अखिल नेपाल भिक्षु महासंघया अध्यक्ष श्रद्धेय भिक्षु फ्राखु धम्मशोभन महास्थविरं पंचशील बियाबिज्यासे ज्याझ्वः न्ह्याःगु खः । ज्याझ्वलय् मूपाहां वसपोल श्रद्धेय भिक्षु नापं श्रद्धेय लामा भिक्षु गुणसागरं मंकाःकथं लुमन्ति पौ पितब्वज्या यानाबिज्याःगु खः ।
वाइएमबीए गोल्डेन क्लबया संयोजकलिसें स्मारिक प्रकाशन समितिया संयोजक यज्ञमान शाक्यं लसकुस यानादीगु ज्याझ्वलय् लुमन्ति पतीइ च्वसु च्वयादीपिनिगुपाखें पुलांम्ह मन्त्री डा. केशवमान शाक्य, संस्थाया पुलांम्ह नायः हेरारत्न शाक्यं थःथःगु च्वसु नापं लुमन्ति पती दुथ्यानाच्वंगु च्वसुया बारे नुगःखँ तयादीगु खः ।
उगु इलय् संस्थापाखें हालय् जक अखिल नेपाल भिक्षु महासंघया अध्यक्षय् निर्वाचित जुयाबिज्याःम्ह श्रद्धेय भिक्षु फ्राखु धम्मशोभन महास्थविरयात हनेज्या नं याःगु खः । थुकथं हे लुमन्ति पौ पिथनेगु ज्याय् संयोजक जुयाः मूवंगु ई बियादीम्ह शाक्ययात बुद्ध मूर्ति लःल्हाःगु खः ।
ज्याझ्वःया अन्तय् मूपाहां भिक्षु धम्मशोभन महास्थविरपाखें पुण्यानुमोदन यासें ज्याझ्वः क्वचायेकूगु खः ।
LEAVE YOUR COMMENTS