रक्षामन्त्री रिजालपाखें राजीनामा

येँ- कांग्रेस महाधिवेशनं महामन्त्री पदय् पराजित जुइवं रक्षामन्त्री मिनेन्द्र रिजालं थःगु पदं राजीनामा बियादीगु दु । म्हिगः प्रधानमन्त्री ज्याकू सिंहदरवारय् वनाः वय्कलं प्रधानमन्त्री शेरबहादुर देउवायात राजीनामा पौ लःल्हानादीगु खः । थ्व स्वयां न्ह्यः वय्कलं मतगणना जुयाच्वंगु इलय् थः बुइगु अवस्था खनेदयेवं सामाजिक सञ्जालपाखें राजीनामा बीगु घोषणा यानादीगु खः । थुकिया लिसें वय्कलं थम्हं राजनीतिं संन्यास कायेफइगु संकेत नं बियादीगु दु ।

मन्त्री पदं राजीनामा बीधुंकाः सिंहदरवारय् ग्वसाः ग्वःगु पत्रकार सम्मलेनय् वय्कलं थः राजनीतिइ पिहां वनेफइगु संकेत बियादीगु खः । वय्कलं महाधिवेशनय् थःगु समर्थनया आधार तसकं संकुचित खनेदुगुलिं मन्त्री पदं राजीनामा बियागु खँ धयादीगु खः ।

पत्रकारपिंत सम्बोधन यायेगु झ्वलय् वय्कलं धयादिल, ‘जिं संकेत यानागु मखु, सम्भावना द हे मदु धयागु नं मखु, जि उगु निर्णयलय् थ्यंगु मदुनि, तर छता खँ छु धाःसा गम्भीर रुपं सोचे याये, सोचे यायेधुंकाः गुगु निर्णयय् थ्यनी उगु खँया जानकारी छिकपिंत बी ।’ उकथं हे नेता रिजालं सार्वजनिक पदय् च्वनेगु जूसां नं राजनीतिइ च्वनेगु वा मच्वनेगु धयागु याकनं निर्णय यायेगु खँ धयादीगु दु ।

वय्कलं प्रतिनिधिसभाया कार्यकाल दत्तले सरकारयात प्रतिनिधिसभा दुजःया हैसियतं ग्वाहालि यायेगु खँ धयादीगु दु ।

सम्बन्धित बुखँ

LEAVE YOUR COMMENTS