प्रदेशसभात नं भंग जुइगु सम्भावना गुलि ?
येँ (नेपालभाषा टाइम्स) – प्रधानमन्त्री केपी शर्मा ओलीं प्रतिनिधिसभा भंग यायेधुंकाः आः प्रदेश सरकार व प्रदेशसभातय् स्थिति छु जुइगु खः धइगु न्ह्यसः ब्वलनाच्वंगु दु ।
थौंकन्हय् विद्यमान न्हय्गू प्रदेश मध्ये निगू प्रदेशय् जक प्रधानमन्त्री ओलीया बहुमत दुसा प्यंगू प्रदेशय् ओलीया पकड मदु । उकिं प्रम ओलीं थाकुइगु अवस्था वल धाःसा प्रदेशसभा तकं विघटन याइगु खःला धइगु न्ह्यसः ब्वलंगु दु । थ्व झ्वलय् कानुनविद्तय्सं धाःसा संघीय संसद विघटन याःथें प्रदेशसभा विघटन यायेफइगु कानुनी व्यवस्था मदुगु खँ धाःगु दु। संविधानविद् पूर्णमान शाक्यं ‘नेपालभाषा टाइम्स’ लिसे खँ ल्हासें संविधानतः प्रदेशसभा खारेज यायेगु अधिकार केन्द्र सरकारयाके मदु । तर प्रदेश सरकारं राज्य विरुद्ध छुं नं कथंया गतिविधि यात धाःसा अज्याःगु अवस्थाय् संघीय सरकारया सिफारिसय् राष्ट्रपतिं प्रान्तीय सभा विघटन यायेफुगु खँ कनादिल ।
तर अज्याःगु अवस्था धइगु प्रदेश सरकारपाखें देय्या अखण्डता व संविधान अःखः ज्या जूसा जक लागू याये फइ । राजनीतिक विश्लेषक राजेन्द्र महर्जनं नं प्रदेशसभा विघटन यायेगु अधिकार प्रधानमन्त्रीयात मदुसां नं प्रधानमन्त्रीं आः गुगु पलाः ल्ह्वंगु दु, उकियात कयाः स्वयेगु खःसा मेगु असंवैधानिक पलाः मल्ह्वनी धाये फइगु अवस्था मदुगु खँ कनादीगु दु। वय्कलं धयादी, ‘प्रधानमन्त्री ओलीपाखें संसद विघटन यायेगु गुगु ज्या जूगु दु, थ्व असंवैधानिक खः, यदि थुकियात वैधता बिल धाःसा संविधान व गणतन्त्र तकं निलम्बन जुइफु, उकिं प्रधानमन्त्री ओलीं ल्ह्वंगु पलाः विरुद्ध राजनीतिक पार्टीतय्सं आः हे जनमत ब्वलंकेमाः ।’
LEAVE YOUR COMMENTS