निगू दशकलिपा बार्सिलोना च्याम्पिन्स लिगया समुह चरणं आउट
एजेन्सी÷ स्पेनिस महारथी क्लब बार्सिलोना निगू दशकलिपा च्यान्पियन्स लिगया समूह चरणं पिने लाःगु दु । बुधवाः चान्हय् जूगु कासाय् जर्मन क्लब बार्यन म्युनिखलिसे बूगु व पुचःया मेगु कासाय् बेन्फिकां डेनामो किभयात बुकेवं क्याटलान क्लब बार्सिलोना १७ दँ लिपा च्याम्पियन्स लिगया समुह चरणं आउट जूगु खः । थ्वयां न्ह्यसः सन् २०००÷०१ य् जूगु च्याम्पियन्स लिगय् समूह चरणं बार्सा आउट जूगु खः ।
बार्सिलोनायात बार्यन म्युनिखं ३–० गोलं बुकूगु खः । बार्यनया निंतिं थोमस मुलर, लोरी साने व जमल मुसिआलां छगू छगू गोल याःगु खः । अथे हे पुचःया मेगु कासाय् बेन्फिकां डेनामो किभयात २–० गोलं बुकाः अन्तिम १६ य् थाय् दयेकल । बार्सा पुचःया स्वंगूगु थासय् लाना समूह चरणं पिने लाःवंगु खःसा बार्यन म्युनिख समूह चरणया दक्व कासा त्याका शीर्ष थासय् च्वनाः अन्तिम १६ य् थ्यंगु खः ।
च्यापिम्यन्स लिगया बुधवाः जूगु मेगु कासाय् युभेन्ट्सं माल्मोयात १–० गोलं बुकलसा पुचःया मेगु कासाय् चेल्सी व जेनिथ सेन्ट पिटर्सवर्गं स्वंगू स्वंगू गोलया बराबरी म्हितल । थ्व पुचलं युभेन्ट्स व चेल्सीं अन्तिम १६ य् थाय् दयेकूगु खः ।
लिगया मेगु कासाय् म्यानचेस्टर युनाइटेडं योङ ब्वाइजलिसे छगू छगू गोलया बराबरी म्हितल । अथे हे लिलें वुल्फसवर्गयात ३–१ गोलं व साल्जवर्गं सेभियायात १–० गोलं बुकाः नकआउट चरणय् थाय् दयेकल ।
LEAVE YOUR COMMENTS