नां ज्वःलानाः जूगु आपत !

येँ – नांया कारणं नं गबलें गबलें मखु मखुगु हे दुःख जुइयः । अज्याःगु हे छगू दुःख नांजाःम्ह इतिहासकार डा. गौतमवज्र वज्राचार्ययात नकतिनि जुल ।

नेपाःया नांजाःम्ह पौभाः च्वमि लिसें मूर्तिकार गौतमरत्न वज्राचार्य छुं ई न्ह्यः मंत । गौतमरत्न वज्राचार्य मदुगु बुखँ पिहां वःबलय् अप्वःसां डा. गौतमवज्र वज्राचार्य मंत धकाः तायेकूगु जुयाच्वन । खास यानाः पश्चिमी देय्या गुलिखे पासापिंसं डा. वज्राचार्य मंत धकाः तायेकाः दुःख समेत व्यक्त याना हःगु जुयाच्वन । अन्ततः स्थिति थन तक थ्यन कि डा. वज्राचार्यं थः अझं म्वाना हे च्वनागु दनि, सीम्ह वज्राचार्य गौतमरत्न खः,  वय्कः नांजाःम्ह पौभाः च्वमि खः धकाः सामाजिक सञ्जालय् स्पष्टीकरण हे बीमाःगु अवस्था वल ।

वय्कलं म्हिगः फेसबुक मार्फत छगू सन्देश जारी यासें थः अझं म्वानाच्वनागु व आः अमेरिकाय् जुइगु थ्यांक्सगिभिङ डेया लागिं एप्पल पाई दयेकाच्वनागु दु धकाः जानकारी बियादिल । वयां छुं ई लिपा वय्कलं थम्हं दयेकूगु स्वये साइख्वाः वःगु एप्पल पाईया किपा नं तयादिल ।

थौंकन्हय् अमेरिकाया क्यालिफोर्र्निया राज्यय् च्वंच्वनादीम्ह डा. वज्राचार्य नांजाःम्ह इतिहासकार धनवज्र वज्राचार्यया काय्चा खः । डा. वज्राचार्यं ‘हनुमानढोका दरवार’ लगायत आपालं अनुसन्धान– मूलक कृतित च्वयादीगु दु ।

नेपालभाषा टाइम्स

च्वमिया मेमेगु

• जनकवि दुर्गालाल श्रेष्ठया नामं चोक
• महानगरं स्वम्ह नेवाः हस्तीयात हनीगु
• खुसि सिथया मापदण्ड स्थगित
• ज्यापु दिवसया लसताय् सुकुन्दा र्‍याली
• मस्तय् अनलाइन जोखिमपाखें सुरक्षित यायेत सरकार प्रतिबद्ध