ने. सं. ११४६ पाेहेलागा द्वादशी - घ्यः चाकु संल्हु / ख्वपय् सम्यक

यल विकासया निंतिं ललितपुर बिकासको लागि समाजया गोष्ठी

यल – झीगु सम्पदाय् लाःगु गाःहिति थौंकन्हय् आपाः धइथें कि त ल्हाना वंगु दुसा कि त लः महाःया अथें लानाच्वंगु दु । थथे यल जिज्ला दुने लाःगु लः महाःगु गाःहिति छु जुयाः लः मवःगु खः धइगु अनुसन्धान यानाः लः हायेकेगु कुतलय् न्ह्याः वनेगु निंतिं ललितपुर विकासको लागि समाजं ११ सदस्य दुगु कमिटी गठन यानाः ज्या न्ह्याकेत्यनागु खँ ललितपुर बिकासको लागि समाजया अध्यक्ष नापं पुलांम्ह मन्त्री बुद्धिराज वज्राचार्यं म्हीग ललितपुर बिकासको लागि समस्या पहिचान तथा समाधान गोष्ठीइ कनादिल ।

यल जिल्लायात विकास यायेगु निंतिं गज्याःगु समस्यायात पहिचान यानाः उकियात गुकथं समाधान याये फइ धइगु खँय् म्हीग थनया यलध्वाखाय् च्वंगु यल माया केन्द्रया ढोकैमा क्याफेय् छगू गोष्ठी जुल । समाजया अध्यक्ष बुद्धिराज वज्राचार्यया सभापतित्वय् न्ह्याःगु उगु ज्याझ्वलय् संस्कृति, सम्पदा, कला व आर्थिक विकास, शिक्षा विषय व वातावरण तथा सामाजिक क्षेत्र यानाः प्यंगू समूह दयेकाः उकियात कयाः छलफल यानाः छगू लिच्वः पिकासें ज्याझ्वलय् न्ह्यब्वयेगु ज्या जूगु खः ।

संस्कृति तथा सम्पदा पाखे अरिणीतारा वज्राचार्य, कला तथा आर्थिक विकासपाखे हेरारत्न शाक्य, शिक्षा विषयपाखे सुजित शाक्यं थःथःपिनि पुचःया रायसुझाव बियादीगु खः ।गोष्ठी विषययात कयाः समाजया सचिव बिकासरत्न धाख्वां जानकारी बियादीगु खःसा यल जिल्ला बिकासया निंतिं शताब्दी पुरुष डा. सत्यमोहन जोशी व पुलांम्ह मन्त्री ऋद्धिबाबा प्रधानपिंसं थःथःपिनि नुगःखँ प्वंकादीगु खः ।

ज्याझ्वलय् ब्वति कयादीपिं नापं ज्याझ्वः ताःलाकेत ग्वाहालि यानादीपिं सकलसित संस्थाया उपाध्यक्ष इन्द्रमुनि शाक्यं सुभाय् बियादीगु खःसा ज्याझ्वः मोतीशान्ति शाक्यं न्ह्याकादीगु खः ।